याबाबत सविस्तर माहिती अशी की, रायगड जिल्ह्यातील महाड एमआयडीसी पोलिस ठाण्याच्या हद्दीत असणाऱ्या बिरवाडी येथील बाजारपेठेत संतोष तानाजी जाधव यांचे भांड्याचे दुकान आहे. सदर भाड्याचे दुकान हे बाजारपेठेत असणाऱ्या विक्रम स्टॅन्ड शेजारी असून दुकानाचे नाव श्री कृपा भांडी दुकान असे आहे. व्यावसायिक संतोष तानाजी जाधव यांनी गणेशोत्सव काळात श्री गणरायाच्या मूर्तीदेखील विक्रीस ठेवल्या होत्या. मात्र ५ सप्टेंबर रोजी संतोष यांनी स्वतःच्या मालकीचे असलेल्या दुकानातील सिलिंग फॅनला नायलॉन दोरीच्या साहाय्याने गळफास घेऊन आत्महत्या केली. सर्व धंदा पाणी सुरळीत चालू असताना संतोष यांनी अचानक आत्महत्या का केली, याचं कारण अद्यापही अस्पष्ट आहे.

संतोष जाधव यांनी आत्महत्या केल्याप्रकरणी महाड एमआयडीसी पोलीस ठाणे येथे अर्जुन रामचंद्र पवार(वय-५४वर्षे ,बिरवाडी महाड, रायगड) यांनी माहिती दिली आहे. याबाबत ६ सप्टेंबर रोजी महाड एमआयडीसी पोलीस ठाणे येथे सदरच्या मृत्यूची आकस्मित मृत्यू अशी नोंद करण्यात आली. सदरचा मृतदेह शवविच्छेदनाकरिता प्राथमिक आरोग्य केंद्र बिरवाडी येथे पाठवण्यात आला असून संतोष यांनी अचानक आत्महत्या करून आपलं जीवन संपवल्याने परिसरात शोककळा पसरली आहे.

दरम्यान, महाड एमआयडीसी पोलीस ठाण्याचे सहाय्यक पोलीस निरीक्षक जीवन माने यांच्या मार्गदर्शनाखाली पोलीस हवालदार आशिष नटे या संपूर्ण घटनेचा अधिक तपास करीत असल्याची माहिती महाड एमआयडीसी पोलिसांकडून देण्यात आली आहे.