विमानांना पक्षी धडकण्याच्या घटना देशभर घडत असतात. यातून काही ठिकाणी मोठे अपघातदेखील झाले आहेत. या पार्श्वभूमीवर मंगळवारी सकाळी 7.15 वाजतादरम्यान झालेल्या या घटनेकडे गांभीर्याने पाहण्यात येत आहे. जून महिन्यात एअर इंडियाच्या अहमदाबाद-लंडन विमानाला अपघात झाल्यानंतर अनेकांच्या मनात विमानप्रवासाबाबत धडकी भरलेली आहे. अशात मंगळवारी सकाळी इंडिगो एअरलाइन्सच्या फ्लाइट क्रमांक 6 ई 812 या नागपूर-कोलकाता विमानाला पक्ष्याने धडक दिली. निर्धारित वेळापत्रकानुसार विमान येथून सकाळी 7.05 वाजता उडाले. सुत्रांच्या माहितीनुसार, विमानाने टेक ऑफ घेतल्यानंतर रनवेपासून अर्धा ते एक किमी अंतरावर असलेल्या जयताळ्याजवळ पक्षी धडकला. ही घटना घडताच वैमानिकाने येथील एअर ट्राफिक कंट्रोलरशी संपर्क साधला. त्यानुसार आठ ते दहा किमी अंतरावरून विमान परत आले आणि आपात्कालीन लँडिंग करण्यात आले. वेळेत लँडिंग झाल्यामुळे 272 प्रवाशांचा जीव वाचला.
Nagpur Crime: शाळेबाहेर गाठलं, तिचा बोलण्यास नकार अन् त्याने तिला संपवलं, नागपुरात विद्यार्थिनीच्या हत्येने खळबळ
प्रवाशांमध्ये भाजपचे माजी आमदार तसेच नागपूर जिल्हा ग्रामीण अध्यक्ष सुधाकर कोहळे, ऑल इंडिया काँग्रेस कमिटीचे सहसचिव नितीन कुंभलकर, शेखर भोयर यांचा समावेश होता. या आपबीतीबाबत सांगताना सुधाकर कोहळे म्हणाले, ‘विमान उडाल्यानंतर काही मिनिटांतच पक्ष्याने धडक दिल्यामुळे आपात्कालीन लँडिंग करण्यात येत असल्याची घोषणा झाली. अचानक झालेल्या घोषणेमुळे प्रवाशांमध्ये धाकधुक निर्माण झाली. विमान उतरल्यानंतर इंडिगो एअरलाइन्सद्वारे नागपूर-कोलकाता विमान दुरुस्तीसाठी रद्द करण्यात आल्याचे सांगण्यात आले. तसेच प्रवाशांच्या इच्छेनुसार पुढील प्रवासाची सुविधा उपलब्ध करून देण्यात आली. ज्यांना पैसे परत हवे होते, त्यांना त्या संदर्भातील पर्यायांची माहिती देण्यात आली. ज्यांच्या पुढील प्रवासाला बराच वेळ होता त्यांच्यासाठी अल्पोपहाराची व्यवस्था करण्यात आली.’ या संपूर्ण घटनेबाबत इंडिगो एअरलाइन्सने तात्काळ अधिकृत वृत्त जाहीर केले. त्यामध्ये विमानाला पक्षी धडकल्याची कबुली देण्यात आली. विमानाची आवश्यक तपासणी व देखभाल करणे गरजेचे असल्यामुळे संबंधित फ्लाइट रद्द करण्यात आल्याचे कंपनीने म्हटले आहे.

मोठ्या प्रमाणात घारींचा वावर

विमानतळापासून नजीकच्या परिसरात खुल्या स्वरूपातील मटन मार्केट आहे. बरेचदा या परिसराची स्वच्छता करण्यात येत नाही. त्यामुळे येथे मोठ्या आकारातील घार आढळतात. मंगळवारीदेखील सकाळपासून विमानतळ परिसराजवळ मोठ्या प्रमाणात घारींचा वावर होता. विमानाला झालेली क्षती पाहता ही धडक छोट्या आकारातील पक्ष्याने दिलेली नसून ती वजनदार घार असण्याचा अंदाज सुत्रांनी व्यक्त केला आहे. प्राप्त माहितीनुसार, घार तसेच इतर पक्षी विमानतळ परिसरात राहू नये यासाठी रॉकेट (आकाशात उडणारे फटाके) फोडण्यात येतात. यावर मागील तीन दिवसांत 8 ते 10 हजार रुपयांचा खर्च झाला आहे.
Beed News: बसमधून उतरल्या अन् चाकाखाली आल्या, अंबाजोगाईत कामावर निघालेल्या महिलेचा दुर्दैवी अंत, परिसरात हळहळ

राष्ट्रपतींच्या विमानासमोर डुकरांची फौज

काही वर्षांपूर्वी नागपूर विमानतळाच्या धावपट्टीवर मोठ्या प्रमाणात पक्षी आणि बेवारस प्राण्यांचा वावर वाढला होता. विमानतळ परिसराला लागून असलेल्या आमराई येथील मोरांचा थवा पाहिल्यावर हे पक्ष्यांचे अभयारण्य वाटायचे. भटकी कुत्री आणि डुकरांचादेखील हैदोस होता. सप्टेंबर-2015 मध्ये तत्कालीन राष्ट्रपती प्रणव मुखर्जी यांच्या विमानासमोर आठ डुकरांची फौज उभी झाली होती. तेव्हापासून विमानतळ परिसर, धावपट्टी येथे विशेष काळजी घेण्यात येत आहे. या प्रयत्नांमुळे पशु-पक्ष्यांच्या धडकेने विमानाचा अपघात, उड्डाणाला विलंब होण्याचे प्रकार मागील काही वर्षांत कमी झाले आहेत.