3 वेळा बैठकीचं आश्वासन दिलं
सिडकोने २६००० घरांची काढलेल्या सोडती मधील घरांच्या किंमती अत्यंत महाग असल्याने मागील अनेक महिन्यांपासून लढा उभा केला आहे.उपमुख्यमंत्री व नगर विकास मंत्री एकनाथ शिंदे यांनी तीन वेळा बैठकीचे आश्वासन देऊन ही बैठकीस येण्यास टाळले.एवढे महिने होऊन सुद्धा राज्य सरकार किंवा सिडको अजून घरांच्या किंमती कमी करत नाही.या संबंधी मनसे प्रवक्ते व शहरअध्यक्ष गजानन काळे यांनी आज पत्रकार परिषद घेतली. सिडको सोडतधारकांचा संयमचा बांध आता सुटत चालला आहे.सिडको अजून सर्व सामान्यांची किती परीक्षा बघणार असा प्रश्न विचारत राज्य सरकारने गणेशोत्सवापूर्वी या घरांच्या किंमती कमी नाही केल्या तर मनसे सिडको सोडत धारकांना घेऊन ठाण्यामध्ये उपमुख्यमंत्री एकनाथ शिंदे यांच्या घरावर धडकेल असा इशारा गजानन काळे यांनी दिला.

२० ते २५ टक्के घरांच्या किंमती कमी करण्याचं मान्य केलं पण..
सत्ताधारी पक्षाचे आमदार प्रविण दरेकर, विक्रांत पाटील, राष्ट्रवादी (शरद पवार) गटाचे शशिकांत शिंदे यांनी हा विषय अधिवेशनात मांडला.मंत्री उदय सामंत यांनी या घरांच्या किंमती जास्त असल्याचे मान्य करत २० ते २५% नी घरांच्या किंमती कमी करू असे सभागृहात मान्य केला असताना घरांच्या किंमती कमी का होत नाहीत. मंत्रिमंडळ बैठकीत देवेंद्र फडणवीस यांना भेटत असताना ते हा प्रश्न मंत्रिमंडळ बैठकीत मांडून का सोडवत नाहीत असा प्रश्न गजानन काळे यांनी उपस्थित केला.तरी घरांच्या किंमती कमी नाही झाल्या तर गणेशोत्सव काळात सुद्धा मनसे ठाण्यात एकनाथ शिंदे यांच्या बंगल्याच्या बाहेर आंदोलन करेल असा इशारा गजानन काळे यांनी दिला.