मुंबईच्या पश्चिम उपनगरातील गोरेगाव परिसरात ओबेरॉय स्क्वेअर या इमारतीच्या 23 व्या मजल्यावर ही मुलगी राहत होती. ती एका नामांकित महाविद्यालयात इयत्ता अकरावीत शिक्षण घेत होती. तिचे वडील प्रसिद्ध बांधकाम व्यावसायिक आहेत. ती एकुलती एक मुलगी होती.

कशी घडली दुर्घटना?

गुरुवारी दुपारी ती बेडरूममध्ये अभ्यास करत बसली होती. तिची आई आणि आजी-आजोबा घरात होते. वडील कामानिमित्ताने बाहेर गेले होते. दुपारी साडेतीन वाजता अचानक तिने बेडरुमच्या खिडकीतून खाली उडी मारली. उंचावरून खाली पडल्याने तिचा जागीच मृत्यू झाला. इमारतीच्या रिसेप्शनिस्टने तिला पोडियमवर पडताना पाहिले.

या प्रकरणी आरे पोलिसांनी अपमृत्यूची नोंद केली आहे. मात्र घटनास्थळी कोणतीही चिठ्ठी न सापडल्याने तिने आत्महत्या का केली, याचे नेमके कारण अद्याप समजू शकले नाही. ती गेल्या काही वर्षांपासून नैराश्यग्रस्त होती. तिच्यावर अंबानी रुग्णालयात उपचार सुरू होते, अशी माहिती कुटुंबियांनी दिल्याचे पोलिसांनी सांगितले.

लंडनला जाण्याआधी टोकाचं पाऊल

विशेष म्हणजे पुढील शिक्षणासाठी ती 15 दिवसांनी यूकेला जाणार होती. लंडनमधील एका युनिव्हर्सिटीत तिची अॅडमिशनही झाली होती. मात्र त्याआधीच तिने हे टोकाचं पाऊल उचलल्यामुळे तरुणीच्या कुटुंबीयांवर दुःखाचा डोंगर कोसळला आहे, तर परिसरात हळहळ व्यक्त केली जात आहे.

धक्कादायक बाब म्हणजे गेल्या सहा महिन्यांत ओबेरॉय संकुलातील विविध इमारतींमध्ये आत्महत्या होण्याची ही चौथी घटना आहे. मे महिन्यात 17 वर्षीय विद्यार्थिनीने आपल्या आयुष्याची अखेर केली होती, तर जुलै महिन्यात एका 22 वर्षीय तरुणीने आत्महत्या केली होती. या वाढत्या घटनांमुळे चिंता व्यक्त होत आहे.