ठाण्यात गेल्या अनेक वर्षांपासून मुंबई आणि उपनगरातून गोविंदा पथकांची कोट्यवधींच्या बक्षिसांना गवसणी घालण्यासाठी गर्दी होते. तेव्हा पाच ते सहा मुख्य राजकीय आयोजक शहरात असल्याने टेंभी नाका, जांभळी नाका आणि वर्तकनगर येथे गोविंदांची वर्दळ होती. मात्र करोना काळानंतर या आयोजनात भर पडली. तर यंदाही त्यात वाढ झाली असून शहरातील मैदानांची मर्यादित संख्या लक्षात घेता हा उत्सव रस्त्यावर साजरा होतो. त्यामुळे प्रचंड वाहतूक कोंडी होत असल्याने स्थानिकांसह वाहनचालकांना कोंडीला तोंड द्यावे लागते. त्यात यंदा शनिवारी गोपाळकाला त्यावेळी अवघ्या दोन आठवड्यांवर आलेल्या गणेशोत्सवाची खरेदी करण्यासाठी घराबाहेर पडणाऱ्या सर्वसामान्यांना या ‘उत्सवी’ कोंडीचा फटका बसणार आहे.
मोठी बातमी! घोडबंदर रोडवर अवजड वाहनांना ‘नो एंट्री’; 4 दिवस वाहतुकीत बदल, पर्यायी मार्ग कोणते?

मैदानात एक, रस्त्यावर अनेक

वर्तकनगर येथे परिवहनमंत्री प्रताप सरनाईक यांच्या संस्कृती युवा प्रतिष्ठान आणि विष्णूनगर येथील मनसे नेते अविनाश जाधव आयोजित दहीहंडी उत्सव मैदानात होतात. याठिकाणी येणाऱ्या गोविंदांच्या दुचाकी, ट्रक, टेम्पो व चारचाकी वाहनांमुळे स्थानिकांना कोंडी सहन करावी लागते. मात्र या आयोजकांव्यतिरिक्त टेंभीनाका, जांभळी नाका, रघुनाथ नगर, हिरानंदानी मेडोज येथे रस्ते अडवूनच उत्सव साजरा होतो. तर काही वर्षांपासून बाळकूम, कॅसल मिल व मानपाडा हॅप्पी व्हॅली सर्कल येथेही रस्त्याच्या बाजूला दहीहंडी उत्सवासाठी रंगमंच उभारले जातात.

Thane News : वाहनाच्या धडकेत पडले, हेल्मेट असूनही जबर मार; ठाण्यात कॅडबरी जंक्शनवर दुचाकीस्वाराचा अंत, कुटुंबाचा आधार हरपला
तसेच गोविंदांना थर रचण्यासाठी थेट रस्त्याच्या मध्यभागीच जागा दिली जात असल्याने वाहतुकीचा पूर्णपणे बोजवारा उडण्याची शक्यता आहे. यासोबतच यंदा प्रथमच वागळे इस्टेट येथील कामगार नाका येथे शिवसेनेच्या माजी नगरसेवक व रेमंड गृहसंकुल परिसरात एका प्रतिष्ठानच्या माध्यमातून उत्सवाचे आयोजन होत असल्याने शहरात आतील रस्त्यांवर कोंडी होण्याची शक्यता आहे.

वाहतुकीला पर्यायी मार्ग

रस्त्यावरील आयोजनांमुळे वाहतूक दरवर्षीप्रमाणे पर्यायी मार्गाने वळवली जाणार आहे. तसेच उत्सवस्थळी बॅरिगेट्स लावून आयोजक, गोविंदा व बघ्यांच्या गर्दीला एका बाजूला करुन वाहनांची वाहतूक पोलिस व वॉर्डनच्या माध्यमातून सुरळीत ठेवण्यात येईल, असेही वाहतूक पोलिसांनी सांगितले.