राहुल सातपुते यांनी काय आरोप केले आहेत?

“पंढरपुरात श्री विठ्ठल-रुक्मिणी मंदिर समितीतर्फे तुलसी अर्चन पूजेचे आयोजन केले जाते. याच पंढरपूरमधील तुलसी अर्चन पूजेचा अनुभव राहुल सातपुते यांनी शेअर केला आहे. ही पूजा हिंदीत करण्यात आल्याचा आरोप राहुल सातपुते यांनी केला आहे. त्यामुळे महाराष्ट्राच्या आद्य दैवताच्या दरबारात देखील हिंदी सक्ती झालीय का?”, असा प्रश्न त्यांनी उपस्थित केला आहे. “माझ्या कुटुंबाने या पूजेत सहभाग घेतलेला. समितीच्या तुकाराम भुवनात साधारण 30 ते 35 कुटुंब पूजेसाठी जमलेली होती. समितीतर्फे एक गुरुजी स्टेजवर बसून सर्वांना सूचनांच्या माध्यमातून पूजा घडवत होते. सुरुवातील सूचना मराठीत दिल्या. तेवढ्यात ह्या 30 ते 35 कुटुंबांपैकी एक कुटुंब म्हणाले की त्यांना मराठी कळत नाही म्हणून हिंदीत पूजा घ्यावी. यानंतर गुरुजींनी लगेच हसत हसत होकार देत संपूर्ण पूजा हिंदीत सुरु केली”, असा आरोप राहुल सातपुते यांनी केला.

“आपण महाराष्ट्रात आहोत. आमच्या कुटुंबाला हिंदी कळत नाही. महाराष्ट्राची राजभाषा मराठी कळते. त्यामुळे कृपया मराठी भाषेत सूचना द्या. पण यावर गुरुजी माझ्यावर चिडले आणि माईकवरुन म्हणाले, या माणासाचा काय विषय आहे? सिक्युरिटी आणि समितीवाले इकडे या आणि या माणसाशी बोला. त्याशिवाय पुढे पूजा सुरु करता येणार नाही, असं म्हणून त्यांनी माईक बंद केला”, असा आरोप राहुल सातपुते यांनी केला.