ही घटना समर्थ नगरी येथील प्लॉट क्रमांक १०४ मध्ये घडली आहे. मृत डॉक्टरांचे नाव गंगाधर बालाजी हरणे (वय ८०) असे आहे, ते दीर्घकाळापासून होमिओपॅथी व्यवसायात कार्यरत होते. त्यांची पत्नी निर्मला हरणे (वय ७०) या देखील आजाराने त्रस्त होत्या. वृत्तानुसार, गंगाधर हरणे यांना पोटाचे गंभीर विकार आणि दातांचे आजार होते. त्यांच्या या व्याधींवर उपचार सुरू होते, मात्र सततचा शारीरिक त्रास आणि वाढत्या वयामुळे त्यांच्यावर मानसिक ताण आला होता. अखेर या त्रासाला कंटाळून त्यांनी पत्नीसमवेत बुधवारी सकाळी विष घेऊन आत्महत्या करण्याचा प्रयत्न केला.
Nagpur News: दुचाकी उभी केली, काही वेळ थांबला अन् होमगार्डची उड्डाणपुलावरून उडी, नागपूर हादरलं
घटनेच्या वेळेस हे दाम्पत्य घरी एकटेच होते. त्यांची मुलगी एका खासगी शाळेत शिक्षिका असून, लग्न झाल्यानंतर वेगळे राहत होती. तर मुलगा झारखंडमधील एका स्टील प्लांटमध्ये कार्यरत आहे. त्यामुळे हरणे दाम्पत्य एकटेच समर्थ नगरीतील घरात राहत होते.

बुधवारी शेजाऱ्यांनी दोघांनाही घराच्या पॅसेजमध्ये बेशुद्धावस्थेत पहिले. त्यांनी तत्काळ त्यांच्या मुलीला आणि पोलिसांना याची माहिती दिली. मुलगी तातडीने घरी पोहोचली आणि तिने दोघांनाही अंबाझरी परिसरातील एका खासगी रुग्णालयात दाखल केले. डॉक्टरांनी तपासणीदरम्यान गंगाधर हरणे यांना मृत घोषित केले, तर निर्मला हरणे यांची प्रकृती चिंताजनक असल्याने त्यांच्यावर उपचार सुरू आहेत.

पोलिसांनी घटनास्थळी धाव घेतली असता त्यांना विषाची बाटली आणि एक सुसाईड नोट आढळून आली. या चिठ्ठीत त्यांनी त्यांच्या निर्णयासाठी कोणालाही जबाबदार धरू नये, असे स्पष्टपणे नमूद केले आहे. त्यामुळे ही आत्महत्या असल्याची प्राथमिक शक्यता पोलिसांनी व्यक्त केली आहे. सध्या सोनेगाव पोलीस अधिक तपास करत आहेत.

या घटनेमुळे परिसरात शोककळा पसरली आहे. वृद्ध अवस्थेत आजाराने त्रस्त झालेल्या दाम्पत्याने असा टोकाचा निर्णय घेतल्याने समाजात एक गंभीर प्रश्न निर्माण झाला आहे. वृद्ध आणि आजारी लोकांना आधार देणारे सामाजिक आणि कौटुंबिक यंत्रणा किती सक्षम आहेत? असा प्रश्न निर्माण होत आहे. तर सध्या सोनेगाव पोलिसांचा तपास सुरू असून, सुसाईड नोटची सत्यता, घरातील परिस्थिती, आणि नातेवाईकांची चौकशी या अनुषंगाने पुढील कारवाई केली जात आहे. या घटनेमुळे नागपूरकरांमध्ये हळहळ व्यक्त होत आहे.