स्थानकाच्या नावाची रंजक कहाणी
वडाळा स्थानकाचे सुरूवातीचे नाव गोवारी स्थानक होते. गोवारी गावठणीमुळे ते नाव दिले गेले होते. काही काळानंतर या स्थानकाला थोड्या अंतराने मागे आणण्यात आले. त्यावेळी तिथे जवळ असणाऱ्या वडाळा गावावरुन वडाळा रोड असे नामकरण या स्थानकाचे झाले. वडाळा गावठण अजूनही आहे. असे सांगितले जाते की, वडाळा परिसराचे नाव हे वडाच्या झाडावरून पडले आहे. महाराष्ट्रात अनेक अशी गावे आहेत जसं की, वडवली वडगाव, या गावांची नावेही वडाच्या झाडावरुन पडली आहेत असे म्हणतात. तसेच या वडाळाबद्दल दुसरी गोष्ट अशी की, या परिसरात पुर्वीच्या काळी छोटीशी टेकडी होती आणि त्यात गुहा होती. या गुहेत वाघ असे. लोकांना त्या वाघाचे डोळे दिसतं त्यामुळे त्या टेकडीला वाघडोळा म्हटलं जात असे. या वाघडोळावरुन वडाळा नाव पडले असेही लोकांकडून सांगितले जाते.

संत तुकारामांनी केली मंदिराची स्थापना
मुंबईतील प्रतिपंढरपुर म्हणून ओळखले जाणारे मंदिर म्हणजे वडाळ्याचे विठ्ठल रखुमाईंचं मंदिर हे असंख्य भाविकांचे श्रद्धास्थान आहे. या मंदिराची स्थापना साक्षात संत तुकाराम महाराजांनी केल्याचे स्थानिक लोक सांगतात. आषाढी कार्तिकी एकादशीलाच नव्हे तर इतर दिवशी या मंदिरात श्रद्धावानांची गर्दी असते. या मंदिरावरुन हा परिसर 400 वर्षांपूर्वीही मुबंईतील महत्त्वाचा भाग होता. येथे मीठागर होती आणि तेथील मीठ घेण्यासाठी दूरवरुन व्यापारी येत असत.

सविनय कायदेभंग चळवळी दरम्यान 1930 रोजी काँग्रेसच्या सुमारे 1500 कार्यकर्त्यांनी वडाळा सॉल्ट वर्क्सवर छापा टाकला होता. ब्रिटिशांच्या अराजकतेला आव्हान देण्यासाठी ही घटना घडली होती. हे स्थानक मुंबईच्या मध्यभागात येते जवळच दादर, माटुंगा आणि शिवडी स्थानक आहेत. येथील राम मंदिर, हनुमान मंदिर, दर्गा, सेंट जोसेफ चर्च अशी विविध धर्मियांची श्रद्धास्थळे आहेत. वडाळ्यात अनेक गृहनिर्माण वसाहती आहेत. भक्ती पार्क, दोस्ती एकर्स, लॉयड्स इस्टेट आहेत. बीपीटीच्या वसाहती आहेत.