वाहतूक कोंडीतून मार्ग काढण्यासाठी दोन पर्यायी रेल्वेमार्ग तयार करण्यात येत असून, त्याबाबत पुण्यात सर्किट हाउस येथे चर्चा करण्यात आली. त्याबाबत पवार यांनी माहिती दिली. ‘पुणे शहरातील वाहतूक कोंडी सोडविण्यासाठी दोन रेल्वे प्रकल्प प्रस्तावित केले आहेत. त्यात तळेगाव-चाकण-उरळी, तर पुणे- अहिल्‍यानगर या दोन्‍ही नवीन प्रस्‍तावित रेल्‍वे प्रकल्पांसाठी भूसंपादनाबाबत जिल्‍हाधिकाऱ्यांना सूचना देण्यात आल्‍या आहेत. त्‍यांनी कार्यवाहीदेखील सुरू केली आहे. पहिला रेल्‍वे प्रकल्‍प चार वर्षांत, तर दुसरा प्रकल्‍प पाच वर्षांत पूर्ण करण्याचे नियोजन आहे.
कोकाटेंना डच्चू, धनंजय मुंडेंना पुन्हा मंत्रिपद मिळणार? अजितदादाचं मोठं वक्तव्य
‘तळेगाव हे मावळ तालुक्यात येते. लोणावळा, कर्जत, तळेगाव, पुणे ही पारंपरिक रेल्वेलाइन पूर्वीपासूनच सुरू आहे. आता नवीन प्रस्तावित रेल्वे प्रकल्पानुसार तळेगाववरून चाकण, चाकणवरून वाघोली, वाघोलीवरून उरुळी आणि उरुळीवरून सोलापूर-पुणे रोडवर रेल्वेमार्ग जोडला जाणार आहे. तळेगाव-उरुळी हा प्रकल्प साधारण ७५ किलोमीटर लांबीचा असून, पूर्णपणे नवीन रेल्वेमार्ग होईल. दुसरा एक मार्ग मिरज रोडवरून मिरज रेल्वेला जोडला जाणार आहे,’ असे पवार म्हणाले.

‘दुसरा रेल्वे प्रकल्प वाघोलीवरून वढू बुद्रुक, शिक्रापूर, अहिल्यानगर या मार्गे जाणार आहे. या मार्गात एकूण आठ स्टेशन असतील. पुण्यावरून कोरेगाव भीमा, शिक्रापूर, रांजणगाव, पिंपळनेर मार्गे अहिल्यानगरपर्यंत हा मार्ग जाणार आहे. ज्यामुळे रांजणगाव एमआयडीसी, सुपे, अहिल्‍यानगर या औद्योगिक पट्ट्यांना रेल्वेचा फायदा होणार आहे,’ असे पवार यांनी सांगितले.
पुणे-मुंबईत CBIची मोठी कारवाई! बेकायदा कॉल सेंटरवर छापे, तिघांना अटक
याशिवाय, महाराष्ट्र राज्य रस्ते विकास महामंडळाचा (एमआरडीसी) रिंग रोड ताथवड्यापासून सातारा मार्गे जाणारा रस्ता रुंदीकरणासह सुरू आहे. बेंगळुरू महामार्गावरील मुकाई चौक ते मुळा नदी हा रस्तादेखील सुधारला जाणार असल्‍याचे पवार म्‍हणाले.

पोलिस आयुक्तांना सूचना
पुण्याच्या काही भागात वाहनांच्या तोडफोडीचे प्रकार वाढले आहेत, याकडे लक्ष वेधले असता अजित पवार म्हणाले, ‘मी सकाळी आल्यावर पोलिस आयुक्तांशी चर्चा केली. काही जण दहशत निर्माण करण्यासाठी दुचाकी, चारचाकी वाहने फोडतात. त्या आरोपींना पकडा आणि कारवाई करा. पुन्हा असे कोणी धाडस करता कामा नये. पिंपरी-चिंचवडच्या पोलिस आयुक्तांनादेखील मी सूचना देणार आहे.’

‘छावा’च्या कार्यकर्त्यांनी घेतली भेट
छावा संघटनेचे कार्यकर्ते विजयकुमार घाडगे यांनी अजित पवार यांची शुक्रवारी सर्किट हाउस येथे भेट घेतली. त्याबाबत अजित पवार म्हणाले, ‘घाडगे यांनी माझी भेट घेऊन लातूर येथे घडलेल्या घटनेची सविस्तर माहिती दिली. त्यांची बाजू मांडली. आमचे निवेदन स्वीकारावे अशी आमची मागणी होती. पण मारहाण करण्याचे काही कारण नव्हते, असे ते म्हणाले. त्याबाबत जे घडले ते चुकीचे घडले. त्या संदर्भात घटनेतील प्रमुखांना मी पदाचा राजीनामा देण्यास सांगितले. त्यांना पदातून मुक्त केले आहे. पोलिसांनी त्यांची कारवाई केली आहे. घाडगे यांच्या भेटीनंतर लातूर येथील पोलिस अधीक्षकांना सूचना दिल्या. घाडगे यांच्या इतर गोष्टींच्या मागण्यावर मंगळवारी निर्णय घेऊ.’

पुण्याजवळ उरुळी येथ येथे मेगा टर्मिनल उभारण्याचे रेल्वे प्रशासनाचे नियोजन आहे. त्यासाठी सुमारे १०० हेक्टर (२५० एकर) जमीन लागणार असून, त्यासाठी भूसंपादनाच्या सूचना देण्यात आल्या आहेत. या प्रकल्पाचा पुण्याला फायदा होणार आहे. –अजित पवार, उपमुख्यमंत्री