धाराशिव जिल्ह्यातही मिशन टायगर जोरावर असल्याचं चित्र आहे. शिवसेना नेते आणि परिवहन मंत्री प्रताप सरनाईक आणि नव्याने आमदार झालेले प्रविण स्वामी यांच्यामध्ये जवळीक निर्माण झाल्याची चर्चा असून ती दिवसेंदिवस वाढताना दिसत आहे.

प्रताप सरनाईक यांच्या कार्यक्रमाला आमदार प्रविण स्वामी यांची हजेरी असतेच. 19 जुलै रोजी परिवहन मंत्री आणि धाराशिवचे पालकमंत्री प्रताप सरनाईक यांनी उमरगा दौऱ्याच्या वेळी आमदार प्रविण स्वामी यांच्या घरी आवर्जून भेट दिली होती. आमदार प्रविण स्वामी यांनी सरनाईक यांचे जल्लोषात स्वागत केले होते.

कोण आहेत प्रविण स्वामी?

प्रविण वीरभद्रय्या स्वामी हे धाराशिव जिल्ह्यातील उमरगा – लोहारा विधानसभा मतदारसंघातून महाविकास आघाडीतर्फे शिवसेना (उद्धव बाळासाहेब ठाकरे) पक्षाच्या तिकिटावर निवडणुकीत विजयी झाले आहेत. तीन वेळा शिवसेना आमदार राहिलेल्या ज्ञानराज चौगुले यांना पराभवाचा धक्का देत स्वामी विजयी झाले.

ज्ञानराज चौगुले हे एकनाथ शिंदेंच्या शिवसेनेकडून विधानसभेला उतरले होते. मात्र प्रविण स्वामींनी 96 हजार 206 मतं मिळवत जवळपास चार हजारांच्या मताधिक्याने चौगुलेंना पराभवाची धूळ चारली.
Yogesh Kadam : मातोश्रींचा डान्स बार गृहराज्यमंत्र्यांना भोवणार? राऊत म्हणाले उचलबांगडी फिक्स, योगेश कदम म्हणतात तुमचा…

प्रविण स्वामींच्या मागणीला यश

आमदार प्रविण स्वामी यांनी उमरगा आगारासाठी 10 इलेक्ट्रिक बस मागितल्या होत्या. ती मागणी परिवहन मंत्री प्रताप सरनाईक यांनी तात्काळ मंजूर करत पाच इलेक्ट्रिक बस उमरगा आगाराला उपलब्ध करुन दिल्या तर उर्वरित पाच इलेक्ट्रिक बस लवकरच दाखल होतील.

माजी आमदार ज्ञानराज चौगुलेंची मध्यस्थी?

शिवसेना पक्षाचे उपनेते आणि माजी आमदार ज्ञानराज चौगुले यांनी परिवहन मंत्री प्रताप सरनाईक आणि आमदार प्रविण स्वामी यांच्यामध्ये मध्यस्थी केली असल्याची चर्चा आहे.
Raj Thackeray : BMC निवडणुकांआधी मनसेत बदलाचे वारे, राज ठाकरेंचा नवा डाव; एक-दोन नव्हे, आठ शिलेदार निवडले; राणे, शेलार, मोरे आणि…
धाराशिव जिल्ह्यात मिशन टायगर यशस्वी होतंय का नाही, हे पुढील काही दिवसात दिसून येईल. मात्र परिवहन मंत्री प्रताप सरनाईक आणि ठाकरे गटाचे आमदार प्रविण स्वामी यांच्या वाढत्या जवळीकतेची चर्चा अधिकच रंगत आहे.