रायगड जिल्ह्यात सध्या काही ठिकाणी हलक्या ते मध्यम स्वरूपात पाऊस सुरु असून परिस्थिती नियंत्रणात आहे. जनजीवन सामान्य होत आले आहे. रायगड पाटबंधारे विभाग कोलाड यांचेकडे सांयकाळी सहाच्या अहवालानुसार अंबा नदीने धोका पातळी ओलांडली असून कुंडलिका नदी इशारा पातळीवर वाहत आहे. उर्वरित नद्या इशारा पातळीपेक्षा कमी प्रवाहात वाहत आहेत.

जिल्हा प्रशासनाने सर्व शासकीय यंत्रणा व नागरिकांना सतर्कतेचा इशारा दिला आहे. जिल्हा पोलीस नियंत्रण कक्षाच्या माहितीप्रमाणे प्रमुख रस्ते व रेल्वेमार्गावरील वाहतूक सुरळीत सुरु आहे. तथापि जिल्ह्यातील काही रस्ते व पुलावरून पाणी ओसरल्यामुळे काही रस्ते सुरु करण्यात आले आहेत.
कोकणात पावसाचं कमबॅक; पुरात अडकलेलं दाम्पत्य सुदैवानं बचावलं; संगमेश्वर बाजारपेठ पाण्यात
रायगड जिल्ह्यातील तळा तालुक्यातील संगम पुलावरील पाणी ओरसले असून वाहतूक सुरु करण्यात आली आहे. महाड तालुक्यातील शिंगरकोंड येथील सुरेश गणपत भोसले यांचा गावाजवळून जाणाऱ्या नदीमध्ये पाय घसरून पडून मृत्यू झाल्याची दुर्देवी घटना घडली आहे.

सावित्री नदीचे पाणी महाड शहरात शिरले होते महाड शहरातील रावढळ पुलावरील पाणी ओसरले असल्याने वाहतूक सुरु करण्यात आली आहे. विन्हेरे विभागातील नागेश्वरी नदीपात्र तुडुंब भरलेले होते. सदर गावातील मल्लिकार्जुन मंदिराजवळील पुलावरील पाणी ओसरले असून पुलावरील वाहतूक सुरु करण्यात आली आहे.

महाड शहरांमधील रायगडकडे जाणाऱ्या दस्तुरी मार्गावरील पाणी ओसरल्याने वाहतूक सुरु करण्यात आली आहे. सांदोशी सावरड रोडवर पडलेलं झाड हटविण्यात आले असून वाहतूक सुरळीत सुरु आहे.

रोहा तालुक्यातील भिसेखिंड येथे रस्त्यावर आलेले झाड जेसीबीच्या सहाय्याने बाजुला करण्यात आले आहे. वाहतूक सुरु करण्यात आली आहे. रोहा भालगाव रस्त्यावर तांबडी, मिसेंखिंड, मेढा, महाळुंगे, कुभोशी याठिकाणी काही प्रमाणात माती रस्त्यावर आली होती, जेसीबीच्या सहाय्याने माती बाजुला करण्यात आली आहे. वरसे-भुवनेश्वर या परिसरातील काही घरांमध्ये शिरलेले पाणी ओसरले आहे. नुकसानीचे पंचनामे करण्यात येत आहेत. महादेव खार येथे रस्त्यावरील दरड हटविण्यात आल्याने वाहतूक सुरु करण्यांत आली आहे. आंबेवाडी-कोलाड नाक्यावर काही दुकानांत शिरलेले पाणी ओसरले आहे.

नागोठणे जवळील चिकणी ते रेल्वे ब्रीजपर्यंत साचलेले पाणी ओसरत आहे. शिरवली गावामधील पाणी ओसरले आहे. धर्मीबाई बाबुराव शिर्के (रा. बौद्धवाडी ता. रोहा) यांचे घराचे अंशतः नुकसान झाले आहे. पोलादपूर तालुक्यातील आंबेनळी घाटामध्ये बरेच ठिकाणी माती व दगड रस्त्यावर आली असल्याने सुरक्षेच्या कारणांमुळे आंबेनळी घाटातील वाहतूक 15 ऑगस्टपर्यंत बंद करण्यात आली आहे. भोराव-सवाद, धारवली, माटवण येथील पाणी ओसरले आहे. ओंबळी गावामध्ये काही घरांजवळ माती घसरली आहे. जिवीत हानी नाही. जेसीबीच्या साहाय्याने माती बाजुला सारण्यात आली आहे.

अलिबाग तालुक्यातील रामराज पुलावरील पाणी ओसरले आहे. अलिबाग बाजारपेठेत पाणी ओसरले आहे. म्हसळा तालुक्यातील ढोरजे येथे नदीपुलावरून मोठ्या प्रमाणात पाणी ओसरले असून वाहतूक सुरु करण्यात आली आहे. सुधागड तालुक्यातील मौजे वावळोली येथील सुभाष मारुती महाले यांचे घराची भिंत कोसळून अंशतः पक्के घराचे नुकसान झाले आहे. श्रीवर्धन तालुक्यातील रानवली येथे एक कच्चे घर पडलं आहे.