या शिष्टमंडळात प्राडा कंपनीचे संकलन आणि विकास विभागाचे संचालक आंद्रे बॉक्सरो, पुरुष तांत्रिक आणि उत्पादन विभागाचे संचालक पाओलो टिव्हरॉन, फुटवेअर विभागाचे व्यवस्थापक डॅनियल कोंटू, तसेच तांत्रिक सल्लागार आंद्रिया आणि रॉबट्रो पोलास्ट्रेली, भारतीय प्रतिनिधी गौतम मेहरा यांचा समावेश होता. त्यांनी कोल्हापुरी चप्पल तयार करणाऱ्या विविध कारागिरांच्या कार्यशाळांना भेटी दिल्या.

कोल्हापुरी चपलेतील रेखीव डिझाइन, हस्तकलेचा दर्जा आणि पारंपरिक पद्धतीने होणारे उत्पादन पाहून या शिष्टमंडळाच्या सदस्यांनी कोल्हापुरी चपलेचे भरभरुन कौतुक केले. काही अधिकाऱ्यांनी प्रत्यक्ष कोल्हापुरी चप्पल घालूनही पाहिल्या. तर छोट्या आकाराचे कोल्हापुरी चपलेचे किचन आवर्जून आपल्यासोबत घेऊन गेले.
Kolhapuri Chappal vs Prada: ‘कोल्हापुरी’चा वाद न्यायालयात; प्राध्यापक गणेश हिंगमिरे यांची ‘प्राडा’विरोधात जनहित याचिका

कोल्हापुरी चप्पल उद्योगाला नवी चालना

या भेटीदरम्यान महाराष्ट्र चेंबर ऑफ कॉमर्स, इंडस्ट्रीज अँड ॲग्रिकल्चरचे अध्यक्ष ललित गांधी, कोल्हापुरी चप्पल व्यावसायिक आणि अनेक पारंपरिक कारागिरही उपस्थित होते. “प्राडासारख्या आंतरराष्ट्रीय ब्रँडचे प्रतिनिधी कोल्हापुरात आले हे मोठे यश आहे. यामुळे कोल्हापुरी चप्पल उद्योगाला नव्याने चालना मिळेल.” असे मत यावेळी गांधी यांनी व्यक्त केले.
Unique Village : महाराष्ट्रातील एकमेव गाव जिथं कुणीच वीज बिल भरत नाही, तरी झीरो लोड शेडिंग!

जगात भारी, आम्ही कोल्हापुरी

कोल्हापुरी चप्पल हा केवळ एक परंपरागत व्यवसाय नसून, शतकानुशतके चालत आलेली एक अनमोल कला आहे. जगभर फॅशनच्या बाजारात आपली छाप पाडू शकेल इतका दर्जा या चप्पलला आहे. मात्र आजवर स्थानिक कारागिरांचे कौशल्य जागतिक स्तरावर फारसे पोहोचले नव्हते. प्राडा कंपनीच्या या भेटीमुळे यामध्ये बदल होण्याची आणि कोल्हापुरी चप्पलला जागतिक ब्रँड बनण्याची शक्यता निर्माण झाली आहे. कोल्हापुरी चपलासाठी एवढ्या मोठ्या कंपनीलाच कोल्हापुरात यावे लागले. या घडामोडींमुळे सध्या कोल्हापुरी चप्पल उद्योगात आनंदाचे वातावरण असून, ‘जगात भारी, आम्ही कोल्हापुरी’ अशा पद्धतीने अभिमान वाटत असल्याचे देखील कोल्हापुरी चप्पल व्यवसायिकांनी बोलून दाखवले.

दरम्यान प्राडाच्या वरिष्ठ वितरकांची आगामी महिन्यांत कोल्हापूरला भेट होणार आहे. त्यामुळे याच पार्श्वभूमीवर काही सकारात्मक व्यावसायिक निर्णय होण्याची शक्यता निर्माण झाली आहे. याचा थेट फायदा कोल्हापुरातील चप्पल व्यवसायिक, शेतकरी, हस्तकलावंत व त्यांच्यावर अवलंबून असलेल्या कुटुंबांना होऊ शकतो. पारंपरिक कलांना आंतरराष्ट्रीय व्यासपीठ मिळवून देण्यासाठी अशा संवादांची आणि सहकार्याची गरज असल्याचे मतही कारागिरांकडून व्यक्त होत आहे.