बीड जिल्ह्यातील अंबाजोगाई या ठिकाणी एक धक्कादायक घटना समोर आली आहे. डॉक्टरांनी कमी दिवसांत आणि कमी वजनाने जन्मलेले बाळ मृत घोषित केल्यानंतर त्याचे नातेवाईक अंत्यसंस्काराची तयारी करत असताना, अचानक बाळाने हालचाल केली आणि ते रडू लागले. या घटनेमुळे सर्वत्र खळबळ उडाली असून, हॉस्पिटल प्रशासनाच्या निष्काळजीपणावर प्रश्नचिन्ह उपस्थित झाले आहेत. मिळालेल्या माहितीनुसार, मंगळवारी एका महिलेला वेळेपूर्वी बाळंतपण झाले. नवजात बाळाचे वजन खूपच कमी होते आणि त्यात त्या बाळाची कसलीही हालचाल होत नव्हती. त्यामुळे डॉक्टरांनी त्या बाळाला मृत घोषित करून बाळ नातेवाईकांकडे सुपूर्द केले. नातेवाईकांनी दुःखात अंत्यसंस्काराची तयारी सुरू केली होती. मृत घोषित केलेल्या बाळाला तब्बल 10 ते 12 तास शव पेटीत ठेवण्यात आले. त्यानंतर शवपेठीत ठेवलेले बाळ नातेवाईकांनी घेऊन आपल्या गावी अंत्यसंस्काराची तयारी केली. मात्र नवजात बाळाच्या आजीने बाळाचा चेहरा बघण्याचा अट्टाहास केला अन् ऐनवेळी बाळ रडू लागले आणि अश्या प्रकारे आज्जी च्या अट्टाहसामुळे सगळा प्रकार समोर आला. यामुळे नातेवाईकांनी परत त्याच रुग्णालयात धाव घेत या बाळाला अति दक्षता कक्षात दाखल केले.. परंतु हा घडलेला प्रकार नेमका कशामुळे घडला? यामध्ये दोषी कोण? याची चौकशी करण्याची मागणी आता केली जात आहे.