हेमा आकाश काळे (वय 35) असं खून झालेल्या महिलेचे नाव आहे. 4 जुलै रोजी सायंकाळी 4:30 वाजेच्या दरम्यान करकंब येथे टेंभी रोडजवळ (ता. पंढरपूर) ही घटना घडली. पोलिसांनी सावत्र दीर मुकुंदराजा काळे यास ताब्यात घेतले आहे.

सावत्र दिराला संशय होता

हेमा काळेचा पती आकाश बिंदल काळे (ता. पंढरपूर) कामानिमित्त पुणे जिल्ह्यातील भिगवण येथे साडूकडे कामाला होता. आकाशची पत्नी हेमा ही करकंब येथे मुलगा प्रथमेश, व्योमेश , हिमेश, प्रेम, रॉकी व मुलगी आरिना एकत्र राहत होते. आकाश हा साड्डू सुमित काळे (रा. भिगवण) यांच्याकडे मासे पकडण्याचे काम करतो. करकंब येथे आकाश आणि हेमाच्या घराजवळ वडील बिंदूल काळे, सावत्र आई शालीक, सावत्र भाऊ मुकुंदराजा व पत्नी सोनी हे मुलांसह राहतात.

मुकुंदराजा याची पत्नी मागील एक महिन्यापासून जामखेड येथे कलाकेंद्रावर नाचण्याकरिता जात आहे. तिला मयत हेमा हिने शिकवून पाठविल्याचा संशय मुकुंदराजाच्या मनात होता. सावत्र दीर मुकुंदराजा आणि सावत्र सासू, सासरा हे सारेजण आकाश आणि त्याची पत्नी हेमावर चिडून होते.

पती आकाशने पत्नी हेमाला धीर दिला होता

हेमाने ही बाब पती आकाशला सांगितली होती. सर्वजण माझ्यावर चिडून आहेत. त्यावेळी आकाशने पत्नीला तू लक्ष देऊ नकोस, मी पाणी घेऊन येतो, म्हणाला. त्यानंतर 5 वाजण्याच्या सुमारास आकाश हा पाणी घेऊन येत असताना बिंदूल, शालिका आणि मुकुंदराजा हे मारायला येत असल्याचे दिसले. त्यावेळी आकाशचा मुलगा प्रथमेश भांडण सोडविण्यासाठी गेले. त्यावेळी मुकुंदराजा हातात कुन्हाड घेऊन हेमावर धावला. तुझ्यामुळेच माझी बायको कलाकेंद्रावर जायला लागली, तुला मारून टाकतो म्हणत तिच्या मानेवर कुन्हाडीने वार केले, तर बिंदूल व शालिका काळे यांनी हेमाला धरले.

आकाशने धावत पोलीस ठाणे गाठले पण…

पतीच्या डोळ्यादेखत पत्नी हेमाला मारहाण होत आहे, यामुळे आकाशने करकंब पोलीस ठाणे गाठले. पोलिसांनी तत्काळ घटनास्थळी धाव घेतली. हेमा जखमी अवस्थेत निपचित पडली होती. पोलिसांनी ताबडतोब हेमाला उपचारासाठी रुग्णालयात हलविले; परंतु उपचारापूर्वीच डॉक्टरांनी तिला मृत घोषित केले. मुख्य आरोपी मुकुंदराजा काळे याला पोलिसांनी अटक केली आहे. पुढील तपास सपोनि सागर कुंजीर हे आहेत.