Mangalvedha Gas Cylinder Blast : सोलापूर जिल्ह्यातील मंगळवेढा तालुक्यात एक हृदयद्रावक घटना घडली आहे. घरगुती गॅसच्या स्फोटात दोन लहान मुलींचा मृत्यू झाला. गॅस गळतीमुळे आग लागली आणि मोठा स्फोट झाला. या दुर्घटनेत चार जण गंभीर जखमी झाले असून दोन चिमुकलींचा मृत्यू झाला आहे.
शेव बनवताना घरगुती गॅसचा भयंकर स्फोट
मंगळवेढा तालुक्यातील नंदेश्वर झरेवाडी परिसरात गंगथडे कुटुंबीयांचा शिरसी येथे हॉटेल व्यवसाय आहे. बुधवारी दुपारी ते शेव बनवत होते. यादरम्यान, गॅसचं रेग्युलेटर काढताना भडका उडाला. शिवाय गॅस पाइप लिकेज होऊन मोठा स्फोट झाला. यामध्ये श्रेया गंगथडे आणि स्वरा गंगथडे या दोघींचा होरपळून मृत्यू झाला आहे. तर दादासाहेब विष्णू गंगथडे, मोनाली दादासो गंगथडे, अनुजा दादासो गंगथडे, सुनीता राहुल गंगथडे असे या घटनेत गंभीर जखमी झाले आहेत.
भीषण अपघातात कार चक्काचूर, ढाब्यावर जेवण.. घरी परतताना आक्रित, तिघा मित्रांचा मृत्यू
पोलिसांनी तात्काळ घटनास्थळी धाव घेतली
घरगुती गॅसच्या स्फोटात दोन लहान मुलींचा मृत्यू आणि चार जखमी झाल्याची वार्ता मंगळवेढा तालुक्यात वाऱ्यासारखी पसरली. मंगळवेढा पोलिसांनी तात्काळ घटनास्थळी धाव घेतली. जखमीना उपचारासाठी सोलापूर येथील शासकीय रुग्णालयात दाखल करण्यात आलं आहे. गॅस स्फोटाची खबर मिळताच मंगळवेढ्याचे पोलिस निरीक्षक दत्तात्रय बोरीगिड्डे, नंदेश्वर बीटचे पोलिस हवालदार कोष्टी आदींनी सदर घटनास्थळी भेट दिली. जखमींची विचारपूस करत अधिक माहिती घेतली आणि उपचारासाठी शासकीय रुग्णालयाकडे रवाना केलं आहे.
गॅसचं रेग्युलेटर काढताना भडका, सिलेंडरच्या स्फोटात दोन चिमुकल्यांचा हृदयद्रावक अंत, चौघे जखमी, मंगळवेढा हादरलं
एकाच घरातील बहिणींंचा अंत
मात्र या दुर्दैवी घटनेत चिमुकल्या मुलींचा मृत्यू झाल्याने संपूर्ण गावात, परिसरात हळहळ व्यक्त होत आहे. दोन चिमुकल्या लेकींच्या जाण्याने कुटुंबावर शोककळा पसरली आहे. एकाच कुटुंबातील सर्व जण हे हॉटेलमध्ये होते, त्यावेळी ही दुर्घटना घडली आणि मुलींचा मृत्यू झाला.
लेखकाबद्दलकरिश्मा भुर्केमहाराष्ट्र टाइम्स ऑनलाइनमध्ये डिजिटल कंटेंट प्रोड्युसर म्हणून कार्यरत. सामना, झी २४ तास, न्यूज १८ लोकमतसह ४ वर्ष पत्रकारिता क्षेत्रातील अनुभव. सामाजिक, मनोरंजन विश्लेषणात्मक लेखनाची आवड.… आणखी वाचा