नामदार गोपाळ कृष्ण गोखले (फर्ग्युसन कॉलेज) रस्त्यावर ‘एआय’वर आधारित वाहतुकीचे नियमभंग शोधणारी प्रणाली दोन ठिकाणी बसवण्यात आली असून, तिच्या आधारे नियमभंग करणाऱ्या वाहनचालकांना दणका देण्यात येणार आहे. डबल पार्किंग करणारे, पदपथावर वाहने उभी करून गप्पा मारणारे, ‘ट्रिपल सीट’, नो-एंट्रीतून प्रवास करणाऱ्या वाहनचालकांना आता दंडात्मक कारवाईला सामोरे जावे लागणार आहे.

महापालिका आणि पोलिसांनी शहरातील रस्त्यांचे सर्वेक्षण करून वाहतूक कोंडी फोडण्यासाठी अल्पमुदतीच्या आणि कमी खर्चाच्या उपाययोजनांवर काम करण्यास सुरुवात केली आहे. फर्ग्युसन कॉलेज रस्त्यावर गोपाळ कृष्ण गोखले चौक (गुडलक) ते फर्ग्युसन कॉलेजचे प्रवेशद्वार या दरम्यान वाहतूक कोंडी होती. ही कोंडी होण्यास प्रामुख्याने रस्त्यावर होणारे डबल पार्किंग, नो-एंट्रीतून प्रवास करणारी वाहने कारणीभूत आहेत. वाहतूक पोलिसांना अशा वाहनांवर कारवाई करण्यावर मर्यादा येतात. त्यामुळे तंत्रज्ञानाच्या साह्याने कारवाई करण्यासाठी पावले उचलली असून, हैदराबाद येथील एका खासगी कंपनीने प्रायोगिक तत्त्वावर ही प्रणाली फर्ग्युसन कॉलेज रस्त्यावर बसवली आहे. हा प्रयोग यशस्वी झाल्यास शहरभर त्याची अंमलबजावणी केली जाणार असून, या माध्यमातून दररोज लाखो बेशिस्त चालकांवर कारवाई करणे शक्य होणार आहे.

वाहतूक पोलिसांनी या प्रणालीसंदर्भात महापालिकेला पत्र लिहिले आहे. त्यात शहरातील वाहतूकस्थितीचे चित्र नमूद केले आहे. मोठ्या रस्त्यावर एखादे वाहन चुकीच्या पद्धतीने उभे केल्यास वाहतुकीची एक बाजू बाधित होत असून, तासाला किमान ५०० वाहनांना त्याचा फटका बसतो. अनेकदा मालाची वाहतूक करणारी वाहने गर्दीच्या वेळी रस्त्यावर उभी केली जातात. या वाहनांवर पोलिसांना कारवाई करण्यास मर्यादाही येते. पोलिसांनी विकसित केलेल्या या नव्या प्रणालीत एखादे वाहन रस्त्यावर किती वेळ उभे आहे, याची माहिती टिपून तातडीने त्यावर दंडात्मक कारवाई करण्याची शिफारस करणार आहे.