सोलापुरात शरद पवार गटाला मोठा धक्का बसला आहे. माजी नगरसेवक तौफिक शेख आणि नूतन गायकवाड यांच्यासह 10 जणांनी अजित पवार यांच्या राष्ट्रवादी काँग्रेसमध्ये प्रवेश केला आहे. आगामी स्थानिक स्वराज्य संस्थांच्या निवडणुकांच्या तोंडावर हा पक्षप्रवेश शरद पवार गटासाठी मोठा धक्का मानला जात आहे.
ऐन निवडणुकीच्या तोंडावर शरद पवारांच्या पक्षाला खिंडार
लवकरच स्थानिक स्वराज्य संस्थांच्या निवडणूका संपन्न होणार आहेत. त्यासाठी कार्यकर्ते आणि पदाधिकारी कामाला लागले आहेत. महानगरपालिका निवडणूकांच्या तोंडावर शरद पवारांच्या राष्ट्रवादीला जबरदस्त हादरा बसला आहे. 10 जणांनी अजित पवारांच्या राष्ट्रवादीत प्रवेश केला आहे. तस्लीम शेख, इब्राहीम कुरेशी, वाहिदाबी शेख, अकिबराजे शेख, जावेद वस्ताद, शोहेब शेख, अकिल नाईकवाडी, युन्नूस शेख, नुरुद्दीन मुल्ला यांचा पक्षप्रवेश झाल्याचे तौफीक शेख यांनी सांगितले. यामुळे ऐन निवडणूकीच्या तोंडावर शरद पवारांच्या राष्ट्रवादीला खिंडार पडलं आहे.
दत्ता मामांचा मास्टरस्ट्रोक; पालकमंत्री असताना दत्तात्रय भरणेंनी हेरलं होतं
5 वर्षांपूर्वी एमआयएम पक्षातून तौफीक शेख आणि सहकाऱ्यांनी राष्ट्रवादी काँग्रेसमध्ये प्रवेश केला होता. दत्तात्रय भरणे यांच्या पुढाकाराने एमआयएमच्या नगरसेवकांनी राष्ट्रवादीत प्रवेश केला होता. महाविकास आघाडीचे सरकार असताना, दत्तात्रय भरणे सोलापूरचे पालकमंत्री होते. राष्ट्रवादीत फूट पडल्यानंतर एमआयएम सोडलेल्या नगरसेवकांसमोर कोणत्या राष्ट्रवादीत राहायचे? असा प्रश्न पडला होता.
या माजी नगरसेवकांनी उपमुख्यमंत्री अजित पवार यांची भेट घेतली होती. मात्र, पक्ष प्रवेशाचा निर्णय लांबणीवर टाकला होता. अखेर अजितदादांच्या उपस्थितीत शरद पवारांच्या पक्षातील नेत्यांनी अजित पवारांची घड्याळ हातात बांधली आहे. यावेळी प्रदेशाध्यक्ष सुनील तटकरे, क्रीडा व युवक कल्याण मंत्री दत्तामामा भरणे, अल्पसंख्याक विभागाचे नेते वसीम बुर्हाण, इरफान शेख आदी उपस्थित होते.