कराडमधील आटके गावाच्या हद्दीत पुणे-बेंगलोर राष्ट्रीय महामार्गावर आयशर टेम्पो व दुचाकीचा भीषण अपघात झाला. या अपघातात दुचाकीवर असणाऱ्या दोन तरुणी आयशर टेम्पोच्या पाठीमागील चाकाखाली सापडल्याने जागीच ठार झाल्या. ही घटना बुधवारी साडेपाच ते सहा वाजण्याच्या सुमारास घडली. करिष्मा उर्फ प्राजक्ता कृष्णत कळसे (वय 27, रा. रेठरे खुर्द, ता. कराड) आणि पूजा रामचंद्र कुऱ्हाडे (वय 25, रा. येरवळे, ता. कराड) असे अपघातात ठार झालेल्या तरुणींची नावे आहेत.

याबाबत पोलिसांकडून व घटनास्थळावरून मिळालेल्या माहितीनुसार , करिष्मा व पूजा ह्या दोघीही मलकापूर येथील डीमार्टमध्ये नोकरी करत होत्या. बुधवारी दुपारी साडेचार वाजण्याच्या सुमारास त्यांची कामावरून सुट्टी झाली. त्यांचाच एक सहकारी आजारी असल्याने त्या वाठार येथे त्या सहकाऱ्यास भेटणार होत्या. त्यासाठी त्या दुचाकीवरून वाठारला निघाल्या होत्या. आटके टप्पा येथे गाडी आल्यानंतर पाठीमागून आलेल्या आयशर टेम्पो दुचाकीला घासला. त्यामध्ये दुचाकीवरील पूजा आणि करिष्मा ह्या दोघी खाली पडल्या आणि टेम्पोच्या पाठीमागील चाकाखाली सापडल्या. टेम्पोचे मागील चाक डोक्यावरून गेल्याने दोघींचा जागीच मृत्यू झाला. या घटनेने महामार्गावर काही काळ वाहतूक ठप्प झाली होती. या अपघातामुळे कळसे आणि कुऱ्हाडे कुटुंबियांवर दु:खाचा डोंगर कोसळला आहे. गावकऱ्यांनाही या अपघातामुळे धक्का बसला आहे.

घटनास्थळी कराड तालुका पोलीस ठाण्याचे पोलीस निरीक्षक महेंद्र जगताप यांच्यासह अपघात विभागाचे कर्मचारी दाखल झाले होते. त्यांनी वाहतूक व्यवस्था सुरळीत केली. या घटनेची नोंद रात्री उशिरा कराड तालुका पोलीस ठाण्यात नोंद करण्याची प्रक्रिया सुरू होती.