जाफराबाद तालुक्यातील खामखेडा येथील एका मुलाच्या लग्नासाठी मध्यस्थ्यींमार्फत मुलगी पाहण्यात आली होती. पण लग्नासाठी अडीच लाख रुपयांची मागणी करण्यात आली. वराकडील मंडळींनी मध्यस्थींची ही अट मान्य केली. त्यानंतर मध्यस्थींनी नवरी मुलगी आणि तिच्या बहिणीला खामखेडा येथे आणून लग्नाचे सोपस्कार करायला प्रारंभ केला. त्यानुसार वराकडील मंडळींनी मुलगी आणि तिच्या बहिणीला नगदी दीड लाख रुपये दिल्यानंतर 8 मे ला विवाह खामखेडा येथे झाला.

देवदर्शनासाठी जाते असं सांगून गेली अन्…

लग्नाच्या दुसऱ्या दिवशी नववधू आपल्या बहिणीसह राजूर येथे देवदर्शनासाठी जाते असं सांगून गेली अन् तेथूनच त्या दोघी पसार झाल्या. नववधू परत न आल्याने पतीसह वराकडील मंडळीत एकच खळबळ उडाली. अखेर नवरदेव मुलाच्या भावाने टेंभुर्णी पोलीस ठाण्यात फसवणूक झाल्याची तक्रार दिली. त्यानुसार टेंभुर्णी पोलीस ठाण्याचे एपीआय सचिन खामगळ आणि त्यांच्या पथकाने तपासाची चक्रे फिरवून दोन मध्यस्थींना ताब्यात घेतले. वधूसह तिच्या बहिणीचा शोध सुरू असल्याचे सांगण्यात आले आहे.

जालना जिल्ह्यात यापूर्वी देखील अशा घटना घडल्याचे उघड झाले होते. त्यातील एक टोळी पोलिसांनी ताब्यात घेतली होती. उत्तरप्रदेशमधील एक टोळी सक्रिय झाली होती. त्यांनी देखील यापूर्वी अनेक जणांना फसवले होते. या टोळीतील दोन महिला आणि एक पुरुष पोलिसांनी ताब्यात घेतला होता. राज्यात मुलांना मुली मिळत नाही म्हणून या संधीचा फायद घेत काही लोकं तरुणांना फसवत आहेत.

दोघांना पोलीस कोठडी

टेंभुर्णी पोलिसांनी ताब्यात घेतलेल्या कल्याणी मजर कुरेशी, शेख पाशा शेख ताजू यांना शनिवारी न्यायालयात हजर करण्यात आले होते. न्यायालयाने त्यांना ११ मे पर्यंत पोलीस कोठडी सुनावली आहे.

आधारमुळे लग्न केले होते रद्द

प्रारंभी कोर्टातून लग्न करायचे म्हणून छत्रपती संभाजीनगर येथे दाम्पत्याला नेण्यात आले होते. तिथे मुलीचे आधारकार्ड अपडेट होत नव्हते. दोन दिवसांपूर्वी मोबाईल हरवल्याचे मुलगी सांगत होती. त्यामुळे ते लग्नही मोडले होते. मुलाकडील नातेवाईकांना संशय आल्याने ते लग्नही मोडले होते. पण सायंकाळी मुलीकडील नातेवाईकांचा फोन आल्यानंतर आणि विश्वासात्मक बोलल्याने लग्न लावण्यात आले होते.