मुंबई: अभिनेत्री आणि भाजप खासदार कंगना रनौत हिच्या सोशल मीडिया टिप्पण्यांमुळे नवा वाद निर्माण झाला आहे. ‘कॉकरोच जनता पार्टी’च्या नेतृत्वाखाली झालेल्या ‘जेन झी’ विद्यार्थ्यांच्या आंदोलनात सहभागी झालेल्यांवर टीका करताना कंगनाने जंतरमंतरवरील आंदोलनाचे व्हिडिओ शेअर केले आणि आंदोलकांना ‘घाण’ तसेच ‘गटार जनरेशन’ असं संबोधलं. या वक्तव्यावरून कंगना रणौत ही वादात सापडली असतानाच शिवसेना उद्धव बाळासाहेब ठाकरे पक्षाच्या नगरसेविका किशोरी पेडणेकर यांनी तिला श्वानाची उपमा देत जहरी टीका केली आहे. “कंगना खासदार आहे, पण ती एक घाणेरडी नटी आहे. तिच्यावर थुंकायला पाहिजे, इतकी ती नालायक बाई आहे,” असा हल्लाबोल पेडणेकर यांनी केला आहे.
कंगना रणौत हिच्यावर टीका करताना किशोरी पेडणेकर पुढे म्हणाल्या की, “पंतप्रधान नरेंद्र मोदी किंवा कंगनाचे जे कोणी नेते आहेत त्यांनी तिला कंट्रोल केलं पाहिजे. तरुण आणि आपले जेन झी यांना तुम्ही पुन्हा आव्हान देत आहात. तरुणांनी तुम्हाला दाखवून दिलं आहे आणि यापुढेही दाखवून देतील. अशी घाणेरडी कुत्री सोडायची आणि भो भो करायला लावायचं आणि हिंदुस्तानातील तरुण मुलं व त्यांच्या आई-वडिलांचा अपमान करायचा अधिकार भाजपच्या या खासदार बाईला दिला कोणी?” असा खरमरीत सवाल पेडणेकर यांनी उपस्थित केला आहे.
दरम्यान, किशोरी पेडणकरे यांच्या या आक्रमक टीकेला भाजपच्या गोटातून कसं प्रत्युत्तर दिलं जातं, हे पाहणं औत्सुक्याचं ठरणार आहे.
कंगनाने तरुणांबद्दल नेमकं काय म्हटलंय?
कंगना रणौत हिने इन्स्टाग्रामवर एक पोस्ट करत आंदोलक विद्यार्थ्यांवर टीका केली. ‘माझ्या आयुष्यात एका ठिकाणी इतकी विद्रूपता कधीच पाहिली नाही. जेन झी आंदोलनांचे हे रील्स उलटी आणणारे आहेत. त्यांची भाषा पाहता प्रत्येक फ्रेम विसंगत, अश्लाघ्य वाटते. यांना जन्म कोण देत आहे आणि वाढवत कोण आहे?’ असं कंगनाने म्हटलं. ‘पाश्चात्य प्रभावाखालील भारतीय महिलांची नवी पिढी ‘जनरेशन गटर’ आहे. त्या ड्रग्ज, मद्यपान किंवा अनेकांशी लैंगिक संबंध ठेवण्याच्या स्वातंत्र्याचा अभिमानाने दिखावा करतात,’ अशी टीका कंगना हिने केली आहे. याबाबतची तिची पोस्ट व्हायरल झाल्यानंतर काँग्रेस नेत्या रेणुका चौधरी आणि खासदार इमरान प्रतापगढी यांनी कंगनाच्या विधानावर आक्षेप घेतला.
तरुणांबद्दल आणखी एक वादग्रस्त वक्तव्य
‘माझ्याकडे अधिकार असता, तर जंतरमंतर परिसरात संचारबंदी लावून पोलिसांना गोळीबाराचे आदेश दिले असते,’ असे वक्तव्य उजव्या विचारसरणीचे राजकीय विश्लेषक आणि राष्ट्रीय स्वयंसेवक संघाशी जवळचे संबंध असलेल्या भारतीय विचार केंद्रमचे माजी पदाधिकारी टी. जी. मोहनदास यांनी केल्याचा व्हिडीओ व्हायरल झाला आहे. मोहनदास यांच्या वक्तव्याविरोधात केरळमध्ये तसेच समाजमाध्यमांवर संताप व्यक्त झाला. भाकपशी संलग्न ऑल इंडिया स्टुडंट्स फेडरेशनने राज्य पोलिस प्रमुखांकडे तक्रार दाखल करून मोहनदास यांच्यावर गुन्हा नोंदवण्याची मागणी केली आहे. दरम्यान ‘मोहनदास यांची भूमिका वैयक्तिक असून ते संघाचे कोणत्याही पातळीवरील पदाधिकारी नाहीत,’ असे निवेदनाद्वारे स्पष्ट करत, संघाचे ज्येष्ठ कार्यकर्ते के. बी. श्रीकुमार यांनी मोहनदास यांच्या वक्तव्यापासून हात झटकले आहेत.