मराठवाड्याच्या काही भागाला सोमवारी अवकाळी पावसाने झोडपले. दुपारी वादळासह गारपीट आणि पाऊस झाला. पावसामुळे भाजीपाला, फळबागा आणि शेतमालाचे मोठे नुकसान झाले आहे. महसूल प्रशासनाने जिल्हानिहाय नुकसानीचा प्राथमिक माहिती अहवाल जाहीर केला आहे. छत्रपती संभाजीनगर जिल्ह्यातील कोडापूर (ता. गंगापूर) येथे शेतवस्तीवर राहणारे अशोक नंदू म्हस्के (वय २२) या तरुण शेतकऱ्याचा अंगावर वीज कोसळून मृत्यू झाला. बीड जिल्ह्यातील मगरवाडी (ता. अंबाजोगाई) येथील सचिन मधुकरराव मगर (वय ३५) यांचा अवकाळी पावसात शेतात वीज पडून मृत्यू झाला. ढोरवाडी (ता. वडवणी) येथील अभिमन्यू पांडुरंग नलभे (वय ३६) यांचा सायंकाळी वीज पडून मृत्यू झाला. जालना जिल्ह्यातील परतूर येथील शेख मुख्तार शेख अख्तर कुरेशी यांचा एक बैल वीज पडून दगावला असल्याचे तहसील कार्यालयाने सांगितले. परभणी जिल्ह्यातील कोरवाडी (ता. जिंतूर) येथील समाधान सुदाम कोंडाळ यांच्या शेतातील गोठ्यावर वीज पडून गाय आणि वासराचा जळून जागीच मृत्यू झाला.

छत्रपती संभाजीनगर तालुक्यासह जिल्ह्यातील सिल्लोड, खुलताबाद, फुलंब्री, पैठण तालुक्यातील अनेक गावात जोरदार पाऊस झाला आहे. खुलताबाद तालुक्यात वादळामुळे लग्न सोहळ्यात धांदल उडाली. काही ठिकाणी वाऱ्यामुळे मांडव पडल्याचे ग्रामस्थांनी सांगितले. वैजापूर तालुक्यातील शिऊर, परसोडा भागात पाऊस झाला आहे. ढगाळ वातावरणामुळे शेतकऱ्यांची कांदे झाकण्यासाठी धावपळ उडाली होती. पैठण तालुक्यातील बिडकीन, चितेगाव, वडजी परिसरात अवकाळी पाऊस आणि गारपीट झाली. गंगापूर तालुक्यातील लासूर बाजार समितीत अवकाळी पावसामुळे शेतकऱ्यांचे मोठे नुकसान झाले. तिथे पावसामुळे धान्याची पोती भिजली आहेत. वाळूज-पंढरपूर भागात गारपीट आणि पावसामुळे नागरिकांची धावपळ उडाली. या भागात मोठ्या आकाराच्या गारा पडल्या आहेत. शेकटा परिसरात वाऱ्यासह जोरदार पाऊस झाला आहे. जालना जिल्ह्यातील बदनापूर, रोहिलागड परिसरात मोठा पाऊस झाला आहे.

दरम्यान, लातूर जिल्ह्यातील रेणापूर तालुक्यात जोरदार पाऊस झाला. लातूर शहरात सायंकाळी विजेच्या कडकडाटासह पाऊस झाला. रेणापूर शहरात वीजपुरवठा खंडीत झाला होता. केज तालुक्यात चिंचोली माळी, हदगाव, डोका, सारुकवाडी परिसरात गारांसह अवकाळी पाऊस पडला आहे.