कॉलेज सुटल्यानंतर आमची तब्बल तीस वर्षांनंतर भेट झाली. 3 एप्रिल 2025 रोजी आमची अचानक अंबरनाथ स्टेशनवर भेट झाली. त्यावेळी संजय लेले यांनीच मला ओळखलं आणि म्हणाले, की अहो, तुम्ही देवेंद्र जैन ना? आम्ही दोघांनीही एकमेकांना ओळखलं आणि तीस वर्षानंतर आम्हा मित्रांची भेट झाली.

तब्बल 30 वर्षांनंतर झालेल्या भेटीची आठवण म्हणून संजय लेले यांनी आपले मित्र देवेंद्र जैन यांच्यासोबत एक सेल्फीही घेतला आणि भेटू परत असं म्हणत दोघेही मार्गस्थ झाले. या घटनेला जेमतेम महिनाही झाला नाही तोच काश्मीर येथील हल्ल्यात तब्बल तीस वर्षानंतर भेटलेला आपला मित्र संजय लेले त्याचा मृत्यू झाल्याची बातमी देवेंद्र जैन यांना कळली आणि त्यांनाही मोठा धक्का बसला.
Pahalgam Terror Attack : आईचा फोन, संजयला गोळी लागलीय… डोंबिवलीतील आत्ते-मामे भावंडांवर पहलगाममध्ये तिहेरी घाला
तीन एप्रिल 2025 रोजी अंबरनाथ रेल्वे स्टेशनवर तब्बल 30 वर्षानंतर माझा कॉलेजचा मित्र संजय लेले भेटला होता. कालच्या दुर्दैवी घटनेमध्ये तोही बिचारा सापडला अशी फेसबुक पोस्ट करत त्यांनी हळहळ व्यक्त केली आहे. देवेंद्र जैन व त्यांच्या महाविद्यालयातील सगळ्या मित्रांना संजय या आपल्या मित्राचा झालेला मृत्यू हा चटका लावणारा ठरला आहे.

नेमकं काय झालं?

संजय लेले यांनी आपले मित्र अतुल मोने, भागशाळा मैदान परिसरात राहणारे हेमंत जोशी यांच्यासह काश्मीरला पहलगाम येथे जाण्याचा निर्णय घेतला. दोन दिवसापूर्वी ते तेथे पोहचले. मोने हे नोकरी आणि भिक्षुकी करत होते. पहलगाम येथे जाणारे बहुतांशी पर्यटक नंदनवनाचा आस्वाद घेण्यासाठी बैसरन टेकड्या भागात आवर्जून जातात.
Pahalgam Attack : रुको रुको बाहर मत निकलो; गोळीबाराचे आवाज, बुलढाण्याच्या कुटुंबाला पहलगामच्या हॉटेल मालकाने वाचवलं
येथे जाण्यासाठी घोडे, खेचरांचा वापर केला जातो. घनदाट जंगलाने वेढलेल्या टेकड्यांवर सुमारे 40 ते 50 एकरचे प्रशस्त मैदान आहे. याठिकाणी मौजमजा, खानपान सेवेची सोय आहे. संजय लेले स्वतः, पत्नी, मुलगा, हेमंत जोशी आणि अतुल मोने या टेकड्यांवर मंगळवारी पर्यटनाचा आनंद घेत होते. दुपारच्या वेळेत अचानक पोलिसी वेशात बैसरन टेकड्यांवरील मैदानात दहशतवादी आले. त्यांनी मैदानाच्या एका भागात घनदाट जंगलाला लागून असलेल्या खानपान सेवेच्या ठिकाणी येऊन पर्यटकांना वेठीस धरले.