सहलींचा हंगाम असल्याने पुण्यातील दोन हजारांहून अधिक पर्यटक सध्या जम्मू काश्मीरमध्ये पर्यटनास गेले आहेत. पहलगाममध्ये झालेल्या हल्ल्याची माहिती जाहीर झाल्यानंतर सर्वच पर्यटन कंपन्यांना धक्का बसला. सगळ्यांनीच तातडीने सहल संयोजकांशी संपर्क साधून आपापले ग्रुप कोठे आहेत, याची माहिती घेतली आणि पर्यटकांना सुरक्षित ठिकाणी हलवले. दरम्यान, पर्यटकांच्या नातेवाइकांनाही परिस्थिती नियंत्रणात असल्याची माहिती पाठविण्यात आली. काश्मीरमधील पर्यटकांची पुढील सहल नियोजनानुसारच होईल, की नाही याबाबत आत्ता सांगता येणार नाही. पर्यटकांच्या सुरक्षेच्या दृष्टीने पुढील निर्णय घेण्यात येतील, असे स्पष्टीकरण पर्यटन कंपनी संचालकांकडून देण्यात आले आहे.
Pahalgam Terror Attack: हम तो बरबाद हो गये…; पहलगाम दहशतवादी हल्ल्यामुळे हादरले पर्यटन व्यावसायिक
पहलगामच्या हल्ल्याच्या पार्श्वभूमीवर काश्मीरमधील सुरक्षा वाढविण्यात आली आहे. पुण्यातून गेलेल्या पर्यटकांना सुरक्षित ठिकाणी हलविण्यात आले आहे. आम्ही त्यांच्या संपर्कात आहोत. प्रशासकीय निर्णय आणि पर्यटकांशी संवाद साधून त्यांच्या पुढील प्रवासाचे नियोजन करण्यात येईल. पर्यटकांना परत आणताना कोणत्याही अडचणी आल्यास सरकारने पर्यटन कंपन्यांना सहकार्य करावे. विमान कंपन्यांनीही परिस्थितीचा फायदा घेऊन प्रवासाचे दर अवाजवी वाढवू नयेत, अशी आमची सगळ्यांची मागणी आहे. -नीलेश भन्साळी, संचालक, पुणे ट्रॅव्हल एजन्सीज असोसिएशन
Pahalgam Terror Attack: पंचस्तरीय सुरक्षा भेदली; नियंत्रणरेषेपासून २०० किमी आत हल्ला झाल्याने प्रश्नचिन्ह
आमचा पुणे परिसरातील ३६ पर्यटकांचा ग्रुप मंगळवारी दुपारीच पहलगाममधून सुखरूप बाहेर पडला. त्यातल्या काहींनी गोळीबारासारखा आवाज ऐकला; परंतु त्यांना पुढील मुक्कामी पोहोचल्यावरच घटनेबाबत समजले. आमचे पर्यटक सध्या सुरक्षित आहेत. पहलगाममध्ये काही मराठी पर्यटक असण्याची शक्यता आहे. पर्यटन कंपन्यांचे प्रतिनिधी एकमेकांच्या संपर्कात असून, आम्ही त्यांची माहिती घेत आहोत. –हृषीकेश पुजारी, सारंग मरकळे, विहार ट्रॅव्हल्स

केसरी ट्रॅव्हल्सचे चारशेहून अधिक पर्यटक सध्या काश्मीरमध्ये आहेत. आम्ही सहल संयोजकांच्या माध्यमातून सगळ्यांशी संपर्कात आहोत. सगळे सुरक्षित आहेत. प्रशासकीय यंत्रणेकडून देण्यात येणाऱ्या सूचनांचे पालन करण्याचे आम्ही आवाहन केले आहे. पर्यटकांच्या सुरक्षेच्या दृष्टिकोनातून योग्य असलेले निर्णय घेण्यात येतील. –झेलम चौबळ, केसरी टूर्स

काश्मीरमध्ये सध्या पर्यटनाचा हंगाम असल्याने पुणे, मुंबईसह महाराष्ट्रातील पर्यटक मोठ्या संख्येने तेथे आहेत. दोन दिवसांपूर्वी ढगफुटीमुळे पर्यटकांचे नियोजन थोडे विस्कळीत झाले होते, त्यात आता मंगळवारी पहलगाममध्ये गंभीर घटना घडली. त्यामुळे तिथे असलेले पर्यटक आणि त्यांचे येथील नातेवाइक दोघेही चिंतेत होते. मात्र, आम्ही त्यांच्या संपर्कात आहोत. तेथील स्थानिक सहलींचे संयोजक आम्हाला सर्व प्रकारेच अपडेट पाठवत आहेत. पुण्यातील सर्व पर्यटन कंपन्याचे व्यवस्थापकही एकमेकांच्या संपर्कात असून, माहितीचे आदानप्रदान सुरू आहे. -विश्वास केळकर, सीमास ट्रॅव्हल्स – विवेक गोळे, भाग्यश्री ट्रॅव्हल्स