सुरेंद्र पगारे हे आपल्या नियमित कर्तव्यावर असताना एक आलिशान मर्सिडीज कार (MH 02-DZ-5061) त्यांना संशयास्पद वाटली. वाहन तपासल्यावर समजले की हा नंबर मुंबईतील मिरा रोड येथील हनित अरोरा यांच्या वाहनाचा आहे. विशेष म्हणजे हनित अरोरा यांच्या गाडीने मुंबईबाहेर प्रवासच केला नव्हता, तरी नागपुरात याच नंबरवर दोन वेगमर्यादा उल्लंघनाचे (ओव्हरस्पीड) दंड भरावे लागले होते.

तपासाची साखळी पुढे जाताच, गाडीचे चालक हरिष तिवारी यांना विचारणा करण्यात आली. त्यांच्या पत्नीही त्यावेळी सोबत होत्या. वाहनाचे मूळ कागदपत्र मागवले असता त्यांनी उडवाउडवीची उत्तरे दिली आणि त्यांच्या मुलगा यश तिवारी याला बोलावले. यश तिवारीही कागदपत्र सादर करण्यात असमर्थ ठरला. त्यामुळे पोलिसांनी गाडी सिताबर्डी वाहतूक कार्यालयात नेऊन पुढील तपास सुरू केला.

खोल तपासात त्या गाडीचा खरा नंबर MH 31-EX-9993 असल्याचे समोर आले. वाहनाचे इंजिन व चेसीस नंबरही याच क्रमांकाशी जुळत होते. चौकशीत हरिष तिवारी यांनी कबुली दिली की, डमी नंबर लावण्याचा सल्ला त्यांचा मुलगा यश याने त्यांना दिला होता. कोणताही नियमभंग झाल्यास चालान मूळ नंबरच्या मालकावर जावा आणि स्वतःला शिक्षा आणि दंड टळावी. अपघात घडल्यासही जबाबदारीपासून बचाव करता यावा, हेही यामागचे कारण होते.

या प्रकारामुळे खोटा नंबर वापरून मुंबईतील निरपराध नागरिक हनित अरोरा यांना विनाकारण दंड भरावा लागला. त्यांनी ठाण्याच्या काशीमिरा वाहतूक विभागात याबाबत तक्रार दाखल केली. यानंतर नागपूरच्या बजाजनगर पोलिसांनी हरिष व यश तिवारी यांच्याविरुद्ध भादंवि २०२३ व मोटार वाहन कायद्यानुसार गुन्हा दाखल केला आहे. वाहतूक विभागाने नागरिकांना इशारा दिला आहे की, वाहनाच्या नंबर प्लेटशी छेडछाड केल्यास कठोर कारवाई केली जाईल. नियम मोडल्यास फसवणूक व गुन्हा म्हणून त्याकडे पाहिले जाईल.