७५ दिवसांत अडीच लाखांचं विक्रमी उत्पन्न

अकोल्याच्या पातूर तालुक्यातील दिग्रस येथील महिला शेतकरी उर्मिला जगन्नाथ शेलगावकर यांचं कार्य पश्चिम विदर्भातील शेतकऱ्यांसाठी प्रेरणादायी ठरत आहे. पातूर तालुक्यातील शेतकरी महिलेने केवळ एका एकरात कलिंगडाची लागवड करत, योग्य नियोजन, मशागत आणि कृषी केंद्रांमधून मार्गदर्शन घेऊन, अवघ्या ७५ दिवसांच्या कालावधीत अडीच लाखांचं विक्रमी उत्पन्न घेतलं आहे. याशिवाय आणखी २५ ते ३० हजारांचं उत्पन्न मिळण्याचा विश्वास त्यांनी व्यक्त केला आहे.
Nanded News : औषधी मिरची लागवडीचा यशस्वी प्रयोग, शेतकरी मालामाल; तब्बल ४५ लाखांचं उत्पन्न
उर्मिला शेलगावकर त्यांच्या शेतात एक कलिंगड सरासरी ६ ते ७ किलो वजनाचं आहे. त्यामुळे व्यापाऱ्यांकडून त्यांच्या मालाला मोठी मागणी होत आहे. त्यांच्या या यशामागे नियमित पीक निरीक्षण, योग्य आंतर मशागत आणि बाजारपेठेचा योग्य अभ्यास महत्वाचा ठरत आहे. एका एकरातील कलिंगडाचं उत्पन्न बघून आणखी दोन एकरात त्यांनी कलिंगडाची लागवड केली आहे. विशेष म्हणजे उर्मिला या उच्च शिक्षित आहेत. एमए, बीएडपर्यंत त्यांनी शिक्षण घेतलं, पण नोकरीच्या शोधात वेळ न घालवता त्यांनी शेती व्यवसाय निवडला आणि आज त्या भरगोस उत्पान्न घेत आर्थिक प्रगतीही करत आहेत.
एकाच खोडाला वांगी आणि टोमॅटो, ब्रोमॉटो पीकातून उत्पादनामध्ये मोठी वाढ; बारामतीत यशस्वी प्रयोग

पतीचीही मोलाची साथ

शेतकरी महिला उर्मिला यांच्या बरोबर त्यांचे पतीही तितकीच साथ देतात. उर्मिला यांची शेतीतील जिद्द, चिकाटी आणि नवनवीन प्रयोग करण्याच्या इच्छेला न थांबवता त्यांना साथ देत, त्यांना प्रोत्साहन देतात. शेतातील कुठलंही काम असो, त्याचा निर्णय उर्मिलाच घेतात. कृषी विभागाचे सल्ले घेऊन अगदी नियोजनबद्ध शेती हे पती-पत्नी करत आहेत. त्यामुळेच त्यांनी शेती यशस्वीरित्या फुलवली आहे.

उर्मिला ताईंकडून इतर शेतकरी घेतात मार्गदर्शन

नाविन्यपूर्ण शेतीचं हे ज्ञान उर्मिला यांनी आपल्या पुरतंच न ठेवता, इतरही शेतकऱ्यांना त्या मार्गदर्शन करतात. भरगोस उत्पन्न घेतल्याने पंक्रोशीत त्यांची वेगळी ओळख निर्माण झाली आहे. त्यामुळे ठिक-ठिकाणाहून शेतकरी त्यांच्या शेतापर्यंत येतात आणि त्यांच्याकडून भरगोस उत्पन्न कसं घ्यायचं याचे धडे गिरवतात. उर्मिला शेलगावकर यांनी दाखवलेला हा भरगोस उत्पन्नाचा मार्ग इतर महिला शेतकऱ्यांना आत्मनिर्भर होण्यासाठी महत्त्वाचा ठरतो आहे.