सध्या महाराष्ट्राच्या राजकारणात प्रमुख तीन विरोधी पक्ष आहेत. विधानसभेत या विरोधीपक्षाची संख्या ५० इतकी आहे. शिवसेना ठाकरे गटाचे २० आमदार, काँग्रेसचे १६ आमदार, राष्ट्रवादी काँग्रेसचे १० आमदार तसेच इतर पक्षांचे आमदार मिळून जेमतेम ५० आमदारांची संख्या आहे.त्यात मविआला दुबळा करण्याचा प्रयत्न सत्ताधाऱ्यांकडून केले जात आहे. ऑपरेशन लोटस, ऑपरेशन टायगर राबवण्यात येत आहे. उद्धव ठाकरेंचे अनेक साथीदार एकनाथ शिंदे यांच्या शिवसेनेत दाखल होत आहे. राजन साळवी,संजना घाडी,संजय घाडी यांनी शिवसेना शिंदे गटात प्रवेश केला आहे. काँग्रेसचे माजी आमदार रविंद्र धंगेकर यांनी शिंदे गटात प्रवेश केला आहे.

परिवर्तन महाशक्ती आघाडी ते नवी आघाडी
बच्चू कडू यांचा प्रहार पक्ष, राजू शेट्टींचा स्वाभिमानी पक्ष, स्वराज्य पक्षाचे युवराज संभाजीराजे छत्रपती यांनी एकत्र येत परिवर्तन महाशक्ती आघाडी स्थापन केली होती. तिसरी आघाडी संबोधले जात होते. मात्र महायुतीच्या लाटेत मविआचीच अवस्था बिकट झाली असताना परिवर्तन आघाडीलाही यश मिळाले नाही. अनेक टर्म विधानसभेत निवडून आलेल्या बच्चू कडूंचाही पराभव झाला होता. पण आता बच्चू कडू, राजू शेट्टी आणि महादेव जानकर एकत्र येत नवी आघाडी सुरू करण्याची शक्यता आहे.

महादेव जानकर यांच्या रासपकडे मुख्यत:धनगर समाजाचा पाठिंबा आहे. बच्चू कडूंचा चांगला जनसंपर्क आहे. तर राजू शेट्टी हे शेतकरी नेते असून शेतकरी प्रश्नांवर अत्यंत आक्रमक भूमिका मांडतात. पश्चिम महाराष्ट्रात त्यांचे वर्चस्व आहे. त्यामुळे जर अशी आघाडी निर्माण झाल्यास येत्या स्थानिक स्वराज्य संस्थांच्या निवडणुकीत काय करिष्मा करतात हे पाहणं औत्सुक्याचे ठरेल.