Chandrapur Crime News : चंद्रपूर जिल्ह्यातील गडचांदूर येथे गुरुवारी एक धक्कादायक घटना उघडकीस आली. प्रज्वल नवले (21) नावाच्या युवकाचा मृतदेह आढळला, तर त्याचा मित्र नागेश लांडगे बेशुद्ध अवस्थेत सापडला. प्रेमप्रकरणातून हे घडल्याची शक्यता वर्तवली जात आहे. नागेश शुद्धीवर आल्यानंतरच सत्य समोर येईल. पोलिसांनी गुन्हा दाखल करून तपास सुरू केला आहे.
प्राप्त माहितीनुसार, गडचांदुर येथील प्रज्वल हा माणिकगड मार्गांवरील वरील एका गॅरेजमध्ये काम करत होता. त्याचे वडील गोवर्धन चिमूर येथे तर आई शीतल नवले गडचांदूर येथे राहतात. दोघे विभक्त असून प्रज्वल आईकडे राहत होता. बुधवारी त्याचा मित्र नागेश लांडगे हा प्रज्वलला भेटायला घरी गेला होता. नागेशच्या हालचालीवरून त्याचा आईला शंका आली. आईने नागेशचा मोबाइल ताब्यात घेतला. आईने मोबाइल ताब्यात घेतल्याने आपले सर्व बिंग फुटणार अशी भावना नागेशच्या मनात निर्माण झाली. प्रज्वलने आईला नागेशचा मोबाइल परत देण्याची विनंती केली. आईने प्रज्वललादेखील त्याचा मोबाइल मागितला. मात्र प्रज्वलने प्रथम नकार दिला व नंतर नागेशचा मोबाइल परत करण्याच्या बदल्यात स्वतःचा मोबाइल आईला दिला. नागेशचा मोबाइल परत मिळाल्यानंतर लगेच दोघे सायंकाळी सायकलने घराबाहेर गेले.
…अन् मृतदेहच आढळला..
दोघे घराबाहेर पडल्यानंतर दुसऱ्या दिवशी ( गुरुवारी ) सकाळी प्रज्वल मृतावस्थेत आढळल्याची बातमी कुटुंबियांना मिळाली. यामुळे कुटुंब हादरले. प्रज्वलचा सोबतीला असलेला त्याचा मित्र नागेश बेशुद्ध अवस्थेत मिळाला. त्यामुळे ही घटना नेमकी का घडली याचे गूढ वाढले आहे.
घटनेला प्रेम प्रकरणाचा स्पर्श
ही घटना प्रेमप्रकरणातून घडल्याची चर्चा आता सुरु आहे. नागेश शुद्धीवर आल्यानंतरच नेमकं काय घडलं याचा उलगडा होणार आहे. घटनेची माहिती मिळताच गडचांदूर पोलिस ठाण्यात गुन्हा दाखल केला आहे.ठाणेदार शिवाजी कदम यांच्या मार्गदर्शनाखाली पुढील तपास सुरू आहे.