येत्या रविवारी (दि. २३) मुख्यमंत्री फडणवीस नाशिक आणि त्र्यंबकेश्वरमधील तयारीबाबतचा आढावा घेण्यासह विविध कार्यक्रमांना हजेरी लावणार आहेत. त्यामुळे फडणवीस यांच्या नाशिकच्या दौऱ्याच्या तयारीच्या पार्श्वभूमीवर प्रशासनाकडून तयारी सुरू झाली आहे. दरम्यान, सिंहस्थ आढावा बैठकीला नाशिकचे खासदार आणि आमदारांनाही निमंत्रित केले जाणार असल्याचे समजते.

नाशिक- त्र्यंबकेश्वरमधील आगामी सिंहस्थाबाबत प्रशासकीय पातळीवरून जोरदार तयारी सुरू आहे. महापालिकेचा सिंहस्थ आराखडा आता सात हजार ७६७ कोटींपर्यंत पोहोचला आहे. दुसरीकडे सार्वजनिक बांधकाम, पोलिस विभाग, जिल्हा परिषद, जलसंपदा, नाशिक विकास प्राधिकरणासह विविध विभागांनीही साडेसात हजार कोटींचा आराखडा सिंहस्थासाठी तयार केला आहे. त्यामुळे सिंहस्थासाठी महापालिकेसह सर्व विभागांचा आराखडा पंधरा हजार कोटींपर्यंत पोहोचला आहे.

परिणामी जानेवारीच्या पहिल्या आठवड्यात राज्याच्या मुख्य सचिव सुजाता सौनिक यांनी महाकुंभासंदर्भात मुंबईत बोलावलेल्या या बैठकीत या आराखड्याची माहिती घेतली होती. त्यानंतर मुख्यमंत्री फडणवीस यांनी दोनवेळा मुंबईत बैठक घेऊन सिंहस्थाच्या कामांसंदर्भात तयारीच्या सूचना दिल्या होत्या. त्यानंतर आता रविवारी मुख्यमंत्री फडणवीस नाशिकमध्ये येऊन सिंहस्थाच्या तयारीचा आढावा घेणार आहेत. नाशिक आणि त्र्यंबकेश्वरमधील सिंहस्थासंदर्भात यापूर्वी दिलेल्या आदेशांची काय अंमलबजावणी झाली आदींचा ते आढावा घेणार आहेत.