एलआयसी ही देशातील सर्वात मोठी आयुर्विमा कंपनी आहे. विमा क्षेत्राचा कितीही विस्तार झाला तरीही एलआयसीवरील नागरिकांचा विश्वास अभेद्य आहे. यामुळेच तळागाळापासून कोट्यवधी नागरिक हे एलआयसीचे विमाधारक आहेत. त्यातच महाराष्ट्रासह मुंबईतील विमाधारकांचाही समावेश आहे. मात्र त्यांना गुजराती भाषेतील अर्जांचा सामना करावा लागत आहे.

नेमकं काय घडलं?

म्युच्युअल फंड गुंतवणूकदार सल्लागार असलेले अगस्ती दाबके यांना हा अनुभव आला. त्यांना एक विमा बंद करायचा असल्याने त्यांनी एलआयसीच्या कांदिवली पूर्व येथील ८९१ क्रमांकाच्या शाखेतून अर्ज आणला. तो मूळ अर्ज इंग्रजीत होता व त्यावर गुजराती भाषेच्या गुजरातील लिपीचा पर्याय होता. मात्र मराठी देवनागरी लिपीतील पर्याय कुठेही नव्हता. अगस्ती यांनी अधिक माहिती घेतली असता त्यांना कळले हे सर्व अर्ज अहमदाबाद विभागातील असल्याने ते गुजराती भाषा व गुजराती लिपीतील आहेत.

यानंतर अगस्ती हे अन्य कामासाठी बोरिवली पश्चिमेच्या एलआयसी शाखा क्रमांक ९३५ मध्ये गेले. तर तेथे याहून भीषण स्थिती आढळली. ‘मुंबई विभाग’ असे ठळक अक्षरात लिहिलेले अर्जदेखील इंग्रजी व गुजराती भाषेत होते. त्यामध्ये मराठीचा पर्यायच नव्हता. याबद्दल अगस्ती यांनी एलआयसीच्या संबंधित अधिकाऱ्यांना जाब विचारला असता त्यांनी त्या विषयाकडे काणाडोळा केला.
Marathi Boy opposed : दादर स्टेशनबाहेर शुभेच्छांचा बोर्ड घेऊन उभ्या मराठी तरुणाला विरोध, प्रख्यात दुकान मालकाने अडवल्याचा आरोप
‘एलआयसीच्या या दोन्ही शाखा मुंबईतील आहेत. मग त्याठिकाणी बाहेरून अर्ज आल्याने ते मराठीत नाही, असे जर एलआयसी सांगत असल्यास ते संतापजनक आहे. हे सर्व अर्ज ऑनलाइनही उपलब्ध आहेत. त्याची प्रिंट काढून उपलब्ध करून देता येईल. तसेच मुंबई ही देशाची आर्थिक राजधानी असल्याने येथे अर्जांची छपाई का होत नाही? जाणूनबुजून गुजराती भाषा मुंबईवर लादण्याचा हा प्रकार आहे. तातडीने मराठी पर्याय असलेले अर्ज एलआयसीने उपलब्ध करावे व यासाठी एलआयसीवर सर्व स्तरातून दबाव येण्याची गरज आहे’, असे ठोस मागणी अगस्ती यांनी ‘महाराष्ट्र टाइम्स’शी बोलताना केली.