वृत्तानुसार, बुधवारी दुपारी बाराच्या दरम्यान पाथरी नगर परिषदेच्या सभागृहामध्ये साई विकास आराखड्यासंदर्भात जिल्हाधिकारी रघुनाथ गावडे यांच्या उपस्थितीत बैठक संपन्न झाली. या बैठकीला विविध पक्षांचे पदाधिकारी नेतेमंडळी यांच्यासह प्रतिष्ठित नागरिक आणि व्यापारी उपस्थित होते. या बैठकीमध्ये साई विकास आराखड्यासाठी मंजूर करण्यात आलेल्या ९८ कोटी रुपयांच्या विकासकामांचा आढावा घेण्यात आला. मुख्यमंत्री एकनाथ शिंदे यांच्या नेतृत्वात साई विकास आराखड्याला मंजुरी मिळाली असून पाथरी येथे ही विकासकामे होत आहेत. पण याच विकास कामांच्या माध्यमातून आता शिवसेना शिंदे गट आणि राष्ट्रवादी आमने-सामने आली आहे.

या बैठकीत राष्ट्रवादीचे माजी आमदार बाबाजानी दुर्रानी हे देखील उपस्थित होते. बैठक सुरू असताना शिवसेनेचे पदाधिकारी आलोक चौधरी यांनी साई विकास आराखड्यासंदर्भात ज्या नागरिकांची घरे, प्रतिष्ठाने पाळली जाणार आहेत त्यांच्यासाठी नगरपालिका हद्दीतील भाजी मार्केट परिसरात शॉपिंग कॉम्प्लेक्स काढून त्यांना तेथे दुकाने देण्यात यावीत, असे निवेदन करण्यात आले. त्याचबरोबर पाथरी नगरपालिकेअंतर्गत घरकुल योजनेत मोठ्या प्रमाणावर भ्रष्टाचार होत असल्याची तक्रारही शिवसेना पदाधिकारी आलोक चौधरी यांनी केली.

ही बैठक दुपारी एकच्या दरम्यान संपली. बैठक संपताच सर्वजण नगरपालिका सभागृहाच्या बाहेर पडले आणि त्याचवेळी नगरपालिकेच्या गेटजवळ बाबाजानी दुर्रानी आणि अन्य त्यांचे कार्यकर्ते उपस्थित होते. शिवसेना पदाधिकारी आलोक चौधरी यांना दुर्राणी यांनी ‘तू जिल्हाधिकाऱ्यांसमोर शॉपिंग कॉम्प्लेक्स आणि घरकुल योजनेत भ्रष्टाचार झाले असल्याचा मुद्दा का उपस्थित केला’ असे म्हणत त्याला मारण्यास सुरुवात केली. बाबाजानी दुर्रानी यांच्यासोबत असलेल्या अन्य तीन कार्यकर्त्यांनी देखील शिवसेना पदाधिकारी आलोक चौधरी याला बेदम मारहाण केली. भांडण सोडविण्यासाठी गेलेल्या शिवसेनेच्या अन्य पदाधिकाऱ्यांना देखील मारहाण करण्यात आली.

मारहाणीची घटना घडल्यानंतर शिवसेना कार्यकर्ते आलोक चौधरी यांनी थेट पाथरी पोलीस स्टेशन गाठले आणि बाबाजानी दुर्रानी सह अन्य तीन जणांविरुद्ध गुन्हा दाखल केला आहे. माझ्या जीवितास बाबाजानी दुर्रानी यांच्यापासून धोका असल्याने मला पोलीस संरक्षण द्यावे, अशी देखील मागणी आलोक चौधरी यांनी केली आहे. दरम्यान या राड्यानंतर मात्र पाथरी शहरामध्ये खळबळ उडाली आहे.

शिवसेना नेते सईद खान व बाबाजानी दुर्रानी यांचे राजकीय युद्ध

पाथरीत वर्चस्व कोणाचे यावरून शिवसेनेचे अल्पसंख्याक विभागाचे प्रदेशाध्यक्ष सईद खान व राष्ट्रवादीचे माजी आमदार बाबाजानी दुर्रानी यांच्यामध्ये शीतयुद्ध सुरू आहे. अशातच पाथरी येथील साई विकास आराखड्यासाठी ९८ कोटी रुपये मंजूर झाल्यानंतर या विकास कामावरूनही आता या दोन्ही नेत्यांमध्ये चांगलाच संघर्ष होताना दिसून येत आहे. नुकत्याच झालेल्या विधानसभा निवडणुकीमध्ये शिवसेनेकडून सईद खान यांनी आणि अपक्ष म्हणून बाबाजानी दुर्रानी यांनी निवडणूक लढवली होती. या निवडणुकीत सईद खान हे तिसऱ्या नंबरवर राहिले तर बाबाजानी दुर्रानी चौथ्या क्रमांकाची मते मिळाली. विधानसभा निवडणुका संपल्या असल्या तरी या दोघांमधला संघर्ष मात्र अद्यापही सुरु आहे. येणाऱ्या काळात आणखी हा संघर्ष तीव्र होण्याची शक्यता आहे.