BJP-NCP on Assembly Deputy Speaker : महायुतीने विधानसभा निवडणुकीत जोरदार कमबॅक केलं. देवेंद्र फडणवीस मुख्यमंत्रीपदी विराजमान झाले. भाजप सर्वाधिक जागा मिळवून क्रमांक एकचा पक्ष ठरला आहे. भाजपकडून आता राष्ट्रवादीला विधानसभा उपाध्यक्ष पद गिफ्ट म्हणून दिले जाणार आहे.
हे पद शिवसेनेला की राष्ट्रवादीला मिळणार? यावरुन चर्चा रंगल्या आहेत. यावर लवकरच शिक्कामोर्तब होणार असल्याची माहिती आहे. या पदावर राष्ट्रवादीच्या नेत्याची वर्णी लागण्याची माहिती समोर आली आहे. छगन भुजबळ यांच्या म्हणण्याप्रमाणे, निवडणुकीत राष्ट्रवादी पक्षाचा स्ट्राईक रेट शिवसेनेपेक्षा जास्त आहे. याचंच बक्षीस म्हणून की काय भाजप आता राष्ट्रवादीला विधानसभा उपाध्यक्ष पद देणार आहे. विधानसभा उपाध्यक्षपदी अण्णा बनसोडे यांची वर्णी लागण्याची शक्यता आहे.
दरम्यान, गेल्या कार्यकाळात अजित पवारांच्या राष्ट्रवादीचे नरहरी झिरवाळ यांनी विधानसभा उपाध्यक्षपदाची धुरा सांभाळली. त्यानंतर आताचे राष्ट्रवादीचे संख्याबळ पाहता पक्षाला भाजपकडून उपाध्यक्षपदाचा मान पुन्हा राष्ट्रवादीलाच देणार असल्याचे समजते. विधीमंडळ कामकाजाच्या शेवटच्या आठवड्यात विधानसभेचे उपाध्यक्ष पदावर निर्णय होणार असल्याची माहिती आहे.
अजित पवार यांनी राष्ट्रवादीची महत्त्वाची बैठक बोलावली आहे. या बैठकीला राष्ट्रवादीचे सर्व महत्त्वाचे नेते उपस्थित आहेत. धनंजय मुंडे बैठकीला हजेरी लावतील. या बैठकीमध्ये विधान परिषदेच्या जागांसंदर्भात चर्चा होणार असल्याची माहिती समोर येत आहे. तसेच इतरही महत्वाच्या विषयांवर चर्चा होणार असल्याचे समजते.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा