Ravindra Dhangekar Join Shiv Sena : काँग्रेस नेते रवींद्र धंगेकर यांनी आज शिवसेनेत प्रवेश केला आहे. उपमुख्यमंत्री एकनाथ शिंदे यांच्या उपस्थितीत रवींद्र धंगेकर यांनी शिवसेनेत प्रवेश केला. यावेळी धंगेकर यांनी मंत्री उदय सामंत यांचं कौतुक केलं. “महाराष्ट्रात घराघरात भांडण झालं तर त्यांनाच घेऊन गेलं पाहिजे. कारण त्यांना जुळवाजुळव चांगली जमते”, अशा शब्दांत रवींद्र धंगेकर यांनी उदय सामंत यांचं कौतुक केलं.
“मी 10 वर्ष शिवसेनेचा नगरसेवक म्हणून काम केलेलं आहे. यापूर्वी एकत्र परिवार म्हणून मी काम केलेलं आहे आणि आज परिवारामध्ये पुन्हा काम करण्याची संधी मिळाली. आपल्या जुन्या सहकाऱ्यांसोबत पुन्हा काम करण्याचा प्रवास सुरु होतोय. मंत्री उदय सामंत यांनी इथपर्यंत आणलेलं आहे. त्यासाठी त्यांचे आभार मानतो”, असं रवींद्र धंगेकर म्हणाले.
‘महाराष्ट्रात घराघरात भांडण झालं तर…’
“कुटुंबातील सदस्य पुन्हा कुटुंबात आणण्यासाठी सामंत साहेबांनी किती काम केलं हे माझ्या दोन-तीन महिन्यात लक्षात आलं. महाराष्ट्रात घराघरात भांडण झालं तर त्यांनाच घेऊन गेलं पाहिजे. कारण त्यांना जुळवाजुळव चांगली जमते”, अशा शब्दांत रवींद्र धंगेकर यांनी उदय सामंत यांचं कौतुक केलं. “एकनाथ शिंदे जसं कॉमन मॅन आहेत, सर्वसामान्य माणस त्यांना भेटू शकतो. तसेच त्यांच्या पावलावर पाऊल टाकून काम करण्याचा प्रयत्न करेन”, असं आश्वासन धंगेकर यांनी यावेळी पक्षश्रेष्ठींना दिलं.
“आपण जो आदेश द्याल त्याप्रमाणे शिवसेनेचं नाव कधी कमी होणार नाही असं काम करू. मला अनेक जण म्हणतात तुम्ही आक्रमक चेहरा आहात. शिंदे साहेब पण आक्रमक चेहरा आहेत. जिथे चूक असेल तिथे शिंदे साहेब सत्ता-बित्ता बाजूला ठेवतील. जिथे चूक आहे तिथं बोलावं लागेल असं मी शिंदे साहेबांच्या कानावर घातल्यावर ते अडवणार नाही कारण त्यांची मूळ हे शिवसेना आहे. एकनाथ शिंदे साहेबांपर्यंत पोहोचण्यासाठी बाकीच्या पक्षांचे बरेच अडथळे आले पण आम्ही मनापासून तुमच्यापर्यंत पोहोचलो”, अशी भावना रवींद्र धंगेकर यांनी व्यक्त केली.
एकनाथ शिंदे काय म्हणाले?
“रवींद्र धंगेकर यांना मी काँग्रेसचा म्हणणार नाही. कारण ते मूळ शिवसैनिक होते. त्यांनी आज धनुष्यबाण उचलला आहे. भगवा हातात घेतला आहे. त्यांचं मी मनापासून स्वागत करतो. रवींद्र धंगेकर हे पुण्यामध्ये लोकनेते म्हणून प्रसिद्ध आहेत. त्यांच्या कामाने त्यांची ओळख केली आहे. मी पोटनिवडणुकीमध्ये तिकडे होतो. सगळी फौज कामाला लावली पण धंगेकरांनी बाजी मारली. रवींद्र धंगेकर सामान्य लोकांचे काम करतो. कोणाला प्लंबर, गॅस रिपेअरवाला, सगळं हवं असेल तर गाडीत बसून पाठवतो. सामान्य माणसाला कशी मदत करायची याची सगळी माहिती आम्हाला तुमच्याबद्दल मिळाली”, असं एकनाथ शिंदे म्हणाले.
“आता तुम्ही शिवसेनेमध्ये आला आहात. लोकांना कळेल हु इज धंगेकर. 2022 साली आपण उठाव केला. एक क्रांती केली त्यावेळेस राज्याने, देशाने नाही, तर जगातील 33 देशांनी आपली दखल घेतली आणि त्यावेळेस जगाला कळालं हू इज एकनाथ शिंदे! लोक म्हणतात आम्ही बाळासाहेबांच्या जुन्या कॅसेट जपून ठेवल्यात त्या कॅसेट जपून ठेवण्यापेक्षा बाळासाहेबांचे विचार जपून ठेवले असते तर लोक कुठे गेली नसती”, अशी टीकादेखील एकनाथ शिंदे यांनी यावेळी केली.