राष्ट्रीय सुरक्षेचा विचार करून तसेच वाहनांमुळे होणारे गुन्हे कमी व्हावेत, रस्त्यावर धावणाऱ्या प्रत्येक वाहनाची ओळख समजावी, नंबरप्लेट बदलणे किंवा बनावट तयार करणे यांसारख्या प्रकारांना आळा बसावा, यासाठी सर्वोच्च न्यायालयाने सर्व वाहनांना हाय सिक्युरिटी रजिस्ट्रेशन प्लेट (HSRP News) बसविण्याचे आदेश दिले आहेत. या आदेशाच्या अंमलबजावणीसाठी महाराष्ट्रात १ एप्रिल, २०१९पूर्वीच्या वाहनांना या प्लेट बसविण्याचा निर्णय घेतला आहे. परिवहन विभागाने ही कार्यवाही सुरू केली आहे.

राज्यातील विविध प्रादेशिक परिवहन कार्यालयात आरटीओ बनावट एचएसआरपीबाबत वाहनधारकांच्या तक्रारी दाखल होत आहे. याबाबत सायबर पोलिस ठाण्यात परिवहन आयुक्तालयाच्या वतीने तक्रार दाखल करण्यात आली आहे. त्यावर कारवाई करण्यात येत आहे. सध्या सहा वेबसाइट बनावट असल्याचे दिसून आले आहे. वाहनधारकांनी अधिकृत वेबसाइटवरूनच एचएसआरपीसाठीची नोंदणी प्रक्रिया पूर्ण करावी, असं परिवहन आयुक्त विवेक भीमनवार यांनी म्हटलं आहे.

परिवहन आयुक्तालयाने ‘एचएसआरपी’साठी तीन संस्था, उत्पादकांची नियुक्ती केली आहे. नव्या प्लेटसाठी नोंदणी करता यावी यासाठी संबंधित संस्थांच्या पोर्टलची लिंक ऑनलाइन उपलब्ध करून देण्यात आली आहे. मात्र, गेल्या दोन दिवसांत अधिकृत संस्थांच्या पोर्टल व्यक्तिरिक्त अन्य बनावट वेबसाइट, लिंक तयार झाली असून, त्याद्वारे वाहनमालकांची फसवणूक सुरू असल्याची बाब या कंपन्यांनी परिवहन आयुक्तालयाच्या निदर्शनास आणून दिली. ही माहिती मिळताच सहायक परिवहन आयुक्तांनी सायबर पोलिसांकडे तक्रार केली. यावरून गुन्हा दाखल करून तांत्रिक विश्लेषणाच्या आधारे सायबर पोलिसांनी तपास सुरू केला आहे.