थोरवेंनी ‘छावा’ चित्रपटातील औरंगजेबाचा दाखल देत राष्ट्रवादीचे प्रदेशाध्यक्ष खासदार सुनील तटकरे यांना औरंगजेबाची उपमा दिली. ‘पंचांचा निर्णय अंतिम असतो आणि या सामन्यात तुम्ही कॅप्टन होत असताना सर्व मिळायला हवं असं चालणार नाहीच. आणि तुम्ही आम्हाला क्रिकेटचे उदाहरण देऊ नका, आम्ही छत्रपती शिवाजी महाराजांचे मावळे आहोत. तटकरे हे औरंगजेब आहेत. त्यांचे वास्तव्य सुतारवाडीत आहे.’ असे म्हणत असताना त्यांनी सर्वांसमक्ष तटकरेंची औरंगजेबाशी तुलना केली. यामुळे महायुतीत शिवसेना वि. राष्ट्रवादी असा संघर्ष तीव्र होण्याची शक्यता आहे. यातच आता सुनील तटकरेंचे पुत्र तथा आमदार अनिकेत तटकरे यांनी थोरवेंवर पलटवार केला आहे.
Shivsene: पालकमंत्रीपदाचा वाद शिगेला; शिंदेंचा आमदार म्हणाला, ‘सुनील तटकरे सुतारवाडीत बसलेले औरंगजेब’
‘महेंद्र थोरवे यांनी त्यांच्या लायकीच्या पलीकडे जाऊन तटकरेंवर जी काही टीका केली आहे यासाठी आता आम्हालाही तोंड उघडावे लागेल. त्यांच्या वक्तव्याचा आम्ही जाहीर निषेध करतो,’ अशा शब्दांत अनिकेत तटकरे यांनी आमदार महेंद्र थोरवे यांना फटकारले आहे

अनिकेत तटकरे म्हणाले, ‘गेल्या ४० वर्षांपेक्षा अधिक काळ तटकरे राजकारणात सक्रिय आहेत. रायगड जिल्ह्याच्या महाराष्ट्राच्या सेवेसाठी अहोरात्र काम करत आहेत आणि ही कालची आलेली पिलावळ, गद्दारीची पिल्लावळ जर अशाप्रकारे जर अशा वल्गना करत असतील तर जशास तसे उत्तर द्यावे लागणार.’

तटकरे पुढे म्हणाले, ‘खरंतर ही गद्दारीची पिलावळ महेंद्र थोरवेंच्या कर्जतमधून सुरू झाली आहे. त्याचे मी एकच छोटेखानी उत्तर देऊ इच्छितो, स्वतःला सत्यवान मानणार किंवा आभास निर्माण करण्याचा प्रयत्न जो काही ते करत आहेत. आपण पाहा विधानसभेच्या निवडणुकीतील आमदार महेंद्र थोरवे व त्यांच्या पक्षाचे पदाधिकारी व शरद पवार गटाचे अनिल नवघरे यांच्यासोबतचे व्हिडिओ फोटो आमच्याकडे आहेत. ते मी माध्यमांना दाखवतो. पण आम्ही इतके दिवस काही बोलत नव्हतो सुसंस्कृतपणाने महायुतीमध्ये कुठेही तडा जाणार नाही याच्यासाठी श्रद्धा आणि सबुरीने आम्ही सगळ्या गोष्टी घेत होतो मात्र काल त्यांनी ज्या पद्धतीने टीका केली. आता आम्हाला तोंड उघडावं लागेल,’ असा इशारा अनिकेत तटकरे यांनी दिला आहे. आता रायगड जिल्ह्यात सुरू झालेल्या शिवसेना व राष्ट्रवादी या वादावर महायुतीचे नेते कोणती भूमिका घेतात, हे पाहणे महत्त्वाचे ठरणार आहे.