सुरज संजय जाधव असे विद्यार्थ्याचे नाव आहे. सुरज हा यवतमाळ जिल्ह्यातील उमरखेड तालुक्यातील टाकळी येथील रहिवासी आहे. किनवट तालुक्यातील गोकुंदा येथील इंदिरा गांधी विद्यालयाचा इयत्ता दहावीचा तो विद्यार्थी आहे. किनवट येथील सुमतीबाई हेमसिंग नाईक कन्या माध्यमिक विद्यालयातील परीक्षा केंद्रावर तो परीक्षा देत आहे. दरम्यान शनिवारी पहाटे साडेपाच वाजेच्या सुमारास सुरजचे वडील संजय जाधव यांचे दिर्घ आजाराने निधन झाले. त्याच्या डोक्यावरचे वडिलांचे छत्र हरपले. पेपरचा वेळ आणि त्यातच वडिलांची अंत्यविधी असा दुःखाचा डोंगर चढून परीक्षा द्यायची कशी? असा तो विचार करू लागला. त्याने शाळेचे मुख्याध्यापक अरविंद राठोड यांच्याशी भ्रमणध्वनीवर संवाद साधून मी परीक्षा देऊ शकत नाही असे सांगितले.

मुख्याध्यापकांनी जे सर्व परिस्थितीवर लक्षात घेऊन त्यांनी प्रत्यक्ष सुरजच्या गावी, घरी जाऊन त्याचे सांत्वन केले. परीक्षा देऊन तू तुझ्या बाबांना खरी श्रध्दांजली दे, आणि त्याला डॉ.बाबासाहेब आंबेडकरांचे उदाहरण देऊन, त्यांच्या जीवनातील दुःखांवर त्यांनी केलेली मात हे पटवून सांगितले. त्यानंतर सुरज अखेर परीक्षा द्यायला तयार झाला. वडिलांचा अंत्यविधी आटोपून सूरजने परीक्षा केंद्र गाठले आणि साश्रुनयनाने इंग्रजी विषयाची परीक्षा दिली.