पुणे: स्वारगेट एसटी आगारात २६ वर्षीय तरुणीवर बलात्कार करणारा आरोपी दत्तात्रय गाडेला शिवाजीनगर न्यायालयात हजर करण्यात आलं. त्याला १२ मार्चपर्यंत पोलीस कोठडी सुनावण्यात आली आहे. पोलिसांनी न्यायालयाकडे १४ दिवसांची कोठडी मागितली होती. पण पोलिसांनी त्याला १२ दिवसांची कोठडी दिली आहे. दत्ता गाडेला आज मध्यरात्री दीड वाजता अटक करण्यात आली. त्याला ६८ तासांनी बेड्या ठोकण्यात आल्या. शिरुरमधील गुणाट गावात गाडेचा शोध सुरु होता.

सरकारी वकिलांचा युक्तिवाद काय?
आरोपीवर दाखल असलेल्या ६ गुन्ह्यांपैकी ५ गुन्ह्यातील तक्रारदार महिला आहेत. त्यामुळे त्याचा महिलांकडे बघण्याचा दृष्टिकोन काय आहे ते स्पष्ट होतं. सखोल तपासासाठी १४ दिवसांची पोलीस कोठडी आवश्यक आहे, असा युक्तिवाद सरकारी वकिलांकडून करण्यात आला. ‘या गुन्ह्यामुळे समाजात तीव्र पडसाद उमटले आहेत. त्यामुळे हा गुन्हा अत्यंत गंभीर स्वरूपचा आहे. आरोपी सराईत असल्याने त्यानं यापूर्वी आणखी काही महिलांना विश्वासात घेऊन त्यांच्यासोबत गैरकृत्य केलेलं आहे का हे तपासायचे आहे,’ असं वकिलांनी न्यायाधीशांना सांगितलं.
Pune Swargate Crime: नराधम गाडेकडून तीनदा स्वत:ला संपवण्याचा प्रयत्न, कसा वाचला? महत्त्वाची माहिती समोर
आरोपी दत्तात्रय गाडे विरोधात आधीपासून दाखल असलेल्या गुन्ह्यांची माहिती न्यायालयात दिली. आरोपीला मदत करणारे आणखी काहीजण त्याच्यासोबत आहेत का हे तपासायचं आहे. आतापर्यंत या प्रकरणात सीसीटीव्ही फुटेज, गुन्ह्याच्या वेळी वापरलेले कपडे तसेच आणखी काही मुद्देमाल जप्त करण्यात आले आहेत, अशी माहिती सरकारी वकिलांनी दिली.
Pune Crime Swargate Depot: घटनेवेळी बसच्या आसपास १० ते १५ जण, पण..; बसमधील अत्याचारावर गृहराज्यमंत्र्यांचा खळबळजनक दावा
आरोपीच्या वकिलांचा युक्तिवाद काय?
आरोपीच्या वकिलांनी न्यायालयात धक्कादायक दावा केला. आरोपी आणि फिर्यादी यांच्यात सहमतीने शारीरिक संबंध झाले. कोणताही अत्याचार झालेला नाही. मुलगी स्वत:हून बसमध्ये गेली, असे सनसनाटी दावे गाडेच्या वकिलांकडून करण्यात आले. आमच्या अशीलानं केलेला गुन्हा एवढा गंभीर नाही. पोलिसांनी त्याचं सोशल मीडिया ट्रायल केलं. त्याचा चेहरा टीव्हीवर दाखवण्यात आला, असा युक्तिवाद वकिलांकडून करण्यात आला. गाडेला केवळ २ दिवसांची कोठडी देण्यात यावी, अशी मागणी त्यांच्याकडून करण्यात आली. पण न्यायालयानं त्याला १२ दिवसांची कोठडी सुनावली.