Vasai Boyfriend Killed Girlfriend: गर्लफ्रेण्ड लग्नासाठी सतत हट्ट करत असल्याने त्याने तिला संपवलं. त्यानंतर त्याला वाटलं की ती पोलिसांची दिशाभूल करु शकतो. पण, त्याचा प्रयत्न फसला आणि अखेर तो दोन महिन्यांनी पकडला गेला.
प्रिया सिंग (वय २५) ही उत्तर प्रदेशातील गोरखपूर येथील तरुणी २७ डिसेंबर २०२४ पूर्वी बेपत्ता झाल्याची तक्रार एम्स पोलीस ठाण्यात तिच्या कुटुंबीयांनी दाखल केली होती. एम्स पोलिसांनी या प्रकरणाचा तपास केला असता प्रियाचा मोबाईल दिल्लीत येथे असल्याचं आढळून आलं. मात्र, तिचा काही शोध लागत नव्हता. दिल्लीत तपास केल्यानंतर प्रियाच्या मोबाईलचे शेवटचे लोकेशन वसई येथे असल्याचे समोर आले. त्यानंतर एम्स पोलिसांनी याप्रकरणी गुन्हे शाखेचे उपायुक्त अविनाश अंभुरे यांची भेट घेऊन संपूर्ण प्रकरणाची माहिती दिली व याप्रकरणी स्थानिक पोलिसांची मदत घेण्यात आली.
वरिष्ठांच्या आदेशानुसार गुन्हे शाखा कक्ष -३ पोलीस अधिकारी कर्मचाऱ्यांनी या प्रकरणाचा तपास सुरू केला. पोलिसांनी अमित सिंग याला गुन्हे शाखेच्या कार्यालयात बोलवून त्याची चौकशी केली असता सुरुवातीला तो उडवा उडवीची उत्तरे देऊ लागला. मात्र पोलिसांनी त्याची कसून चौकशी केल्यानंतर धक्कादायक माहिती समोर आली.
फिरण्याच्या बहाण्याने वसईला बोलावलं अन्…
प्रिया आणि अमित यांचे मागील दीड वर्षांपासून प्रेमसंबंध होते. मात्र अमित सिंग यांच्या कुटुंबीयांचा लग्नाला विरोध होता. त्यामुळे तो लग्न करण्यासाठी टाळाटाळ करत होता. मात्र, प्रिया वारंवार लग्नासाठी हट्ट करू लागल्याने अमित याने फिरण्याच्या बहाण्याने २५ डिसेंबर २०२४ या दिवशी प्रिया हिला वसई येथे बोलावले. पोमण- महाजनपाडा येथे मोकळ्या परिसरात तिला घेऊन गेला आणि तिथे तिची गळा दाबून हत्या केली. त्यानंतर मृतदेहाची विल्हेवाट लावण्यासाठी बाजूला असलेल्या एका नाल्यामध्ये प्रियाचा मृतदेह फेकून दिला.
ज्याप्रमाणे दृश्यम या हिंदी सिनेमांमध्ये मृत व्यक्तीचे थांगपत्ता लागू नये, तो नेमका कुठे आहे हे पोलिसांना कळू नये, पोलिसांची दिशाभूल व्हावी यासाठी मोबाईल एका दुसऱ्या राज्यात जाणाऱ्या ट्रकमध्ये फेकून देण्यात येतो. त्याचप्रमाणे प्रिया ही वसई येथे येऊन पुन्हा दिल्लीला गेली हे भासवण्यासाठी, पोलिसांची दिशाभूल करण्यासाठी अमित सिंग याने तिचा मोबाईल चालू स्थितीत राजधानी एक्सप्रेस ट्रेनमध्ये ठेवून दिला. त्यामुळे एम्स पोलिसांना प्रियाचा नेमका पत्ता लागत नव्हता. मात्र, पोलिसांनी तांत्रिक दृष्ट्या आणि मोबाईल लोकेशन, कॉल डिटेलचा आधार घेत या हत्या प्रकरणाचा छडा लावला आहे. लग्नासाठी हट्ट करू लागल्याने प्रियकरानेच प्रेयसीची हत्या केल्याचे पोलीस तपासात उघड झाली आहेत. आरोपी अमित सिंग याला पोलिसांनी अटक केली असून याप्रकरणी नायगाव पोलीस ठाण्यात भारतीय न्याय संहितेच्या कलम १०३(१), २३८ अन्वये गुन्हा दाखल करण्यात आला आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा