पुण्यातील स्वारगेट बस स्थानकात २५ फेब्रुवारी रोजी पहाटे ५.३० च्या सुमारास एका २६ वर्षीय तरुणीवर अत्याचार करण्यात आला. या घटनेतील आरोपी दत्तात्रय गाडे हा फरार असून पोलिस त्याचा कसून शोध घेत आहेत. अशातच पोलिस आता त्याच्या मित्र आणि मैत्रिणींची देखील चौकशी करित आहेत. दरम्यान, आरोपीच्या मैत्रिणीने पोलिसांना धक्कादायक माहिती दिली आहे. आरोपी दत्तात्रय गाडे हा त्याच्या मैत्रिणीला सतत फोन आणि मॅसेज करायचा. तो तिला भेटण्यासाठीही बोलवत असे. इतकेच नाही तर, तो तिला फोन करुन “तुझ्या मैत्रिणींशी ओळख करुन दे. त्यांच्याशी माझी भेट करुन दे. त्यांच्याशी माझं पॅचअप करुन दे” असं सतत बोलून त्रास द्यायचा अशी माहीती आरोपीच्या मैत्रिणीने दिली.

दरम्यान, फरार आरोपी दत्तात्रय गाडे बलात्काराच्या घटनेनंतर अजूनही फरार आहे. त्याचा शोध घेण्यासाठी पोलिसांच्या १३ टीम तैनात करण्यात आल्या आहेत. पोलिसांनी काल(२६ फेब्रुवारी) रात्री उशीरा त्याच्या दहा ते बारा मित्रांना चौकशीसाठी बोलावलं होतं. त्याच्या शिरुर येथील घरावर पोलिसांचा बंदोबस्त करण्यात आला आहे. पोलिस त्याच्या कुटुंबाची देखील कसून चौकशी करत आहेत.

पुण्याच्या स्वारगेट बसस्थानकातील ज्या बसमध्ये बलात्कार करण्यात आला ती बस फोरेन्सिक तपासासाठी रवाना करण्यात आली आहे. आरोपी दत्तात्रय गाडे याच्यावर ज्येष्ठ महिलांना लिफ्ट देण्याच्या बहाण्याने लुबाडण्याचे गुन्हे त्यावर दाखल आहेत. २०२१ मध्ये कर्ज काढून घेतलेल्या एका चारचाकीने तो पुणे अहिल्यानगर मार्गावर प्रवासी वाहतूक करत होता. यावेळी त्याने अनेक महिलांना लिफ्ट देण्याच्या बहाण्याने लुटलं आहे.