गेल्या वीस वर्षांत गावात शेकडो जणांचे निधन झाले. मात्र, स्मशानभूमीला जाणारा रस्ता वादात असल्याने अंत्यसंस्कारासाठी मृतदेह नेताना अनेक अडचणी येत होत्या. अनेक वेळा झोळी करून किंवा लांबून रस्त्याने फिरून स्मशानभूमीत जावे लागत होते. पावसाळ्यात तर खूपच अडचणी येत होत्या. गावकऱ्यांनी या रस्त्यासाठी शासनदारी हेलपाटे मारत पाठपुरावा सुरू ठेवला होता, मात्र रस्ता काही खुला होत नव्हता. परंतु, कळवणचे तहसीलदार रोहिदास वारुळे यांनी गावात येऊन ग्रामस्थांशी चर्चा केली.

हा रस्ता खुला होण्यास काय अडचणी आहेत, याची माहिती घेऊन ज्यांची जमीन या रस्त्यात येत होती, ते कांतिलाल गवळी व संजय बोरसे यांच्या समन्वयाने रस्त्याच्या कामाची सुरुवात केली. यावेळी वारुळे यांनी हजर राहुन जेसीबीच्या सहाय्याने रस्ता खुला केला. रस्त्यासाठी शांताराम बहिरम, शिवाजी चव्हाण, कांतिलाल बागुल, गुलाब बहिरम, सुभाष बोरसे, काळू चव्हाण, केशव देशमुख, रमेश चव्हाण, प्रभाकर चव्हाण, बाबूराव चव्हाण, गोकुळ बहिरम, राजाराम गायकवाड, शिवराम साबळे, रवींद्र चव्हाण, अंबादास जाधव, रमेश बोरसे, आबा साबळे यांनी पाठपुरावा केला होता.