खंबाळे शिवारात महामार्गावर असलेल्या श्रीहरी पेट्रोल पंपाच्या पाठीमागील शेतातून मध्यरात्री साडेबारा वाजेच्या सुमारास चार अज्ञात तरुणांनी हातात तलवारी, काठ्या घेऊन कर्मचाऱ्यांवर हल्ला केला. पंपावर दोन कर्मचारी कार्यरत होते. अचानक चौघांनी तलवारीने आणि काठ्यांनी मारहाण करण्यास सुरुवात केली. कर्मचारी संतोष रमेश मोहिते (३५, रा. देवळे) व शांताराम धोंडू रेवाळे (वय ६२) या दोघांना तलवारीचा धाक दाखवून त्यांच्या गळ्यातील पैशांची बॅग हिसकावली.

दोघांच्या खिशातील सर्व रक्कम रोख १५ हजार व मोबाइल तीन हजार असा १८ हजारांचा मुद्देमाल घेऊन मागील बाजूने पोबारा केला. घोटी पोलिसांत जबरी चोरीचा गुन्हा दाखल करण्यात आला आहे. पंपावरील दोन्ही जखमी कर्मचाऱ्यांना घोटी ग्रामीण रुग्णालयात दाखल करण्यात आले. अत्यंत वर्दळीच्या असलेल्या या महामार्गावर साडेबारा वाजेच्या दरम्यान टोळक्याने नंग्या तलवारी घेऊन महामार्गावर लूट केल्याने तालुका हादरला आहे. घटना घडताच घोटी पोलिस ठाण्याचे निरीक्षक विनोद पाटील, उपनिरीक्षक उदे यांनी तत्काळ धाव घेऊन चोरट्यांचा माग काढण्याचा प्रयत्न केला. बुधवारी दुपारी नाशिक ग्रामीणचे पोलिस अधीक्षक विक्रम देशमाने, पोलीस उपअधीक्षक हरीश खेडकर यांनी भेट दिली.

भरवस येथून महिला बेपत्ता

निफाड : तालुक्यातील भरवसफाटा येथे बेदाणा शेडवर मोलमजुरी करणाऱ्या अंजली सुभाष गावंडे (३०, मूळ रा. लोणघाट, ता. मोहतळा) या सोमवारी (दि. २४) रात्री घरातून बेपत्ता झाल्या. नातेवाइक व परिचितांकडे शोध घेतला असता माहिती मिळू शकली नाही. त्या २५ रोजी पहाटे ५ वाजता लासलगाव रेल्वे स्टेशन परिसरात दिसल्याचे काही लोकांनी सांगितले. मात्र, पुढील ठावठिकाणा लागला नाही. याप्रकरणी लासलगाव पोलिस ठाण्यात गुन्हा नोंदविण्यात आला आहे.