पहाटे 5.30 वाजता 26 वर्षाची पीडित तरुणी पुण्यातून फलटणच्या दिशेने निघाली होती, स्वारगेट एसटी स्टँड परिसरात आल्यानंतर ती एका बाकड्यावर बसली होती. नेमकं याच वेळी आरोपी त्या ठिकाणी आला. आरोपीने पीडितेला विचारलं ताई तू कुठे चालली आहेस?, त्यावर पीडितेने सांगितलं मी फलटणला निघाली आहे. त्यावर आरोपी म्हणाला फलटणची बस तर तिकडे लागली आहेस तू इथे काय करत आहेस? नंतर तरुणी म्हणाली साताऱ्याला जाणाऱ्या बस इथेच लागतात. पीडिता असे म्हणताचं त्यावर आरोपी म्हणाला ती बस रात्रीची लेट झाली आहे. तू जा पटकन मी तुला बसवतो, असं गोड बोलून आरोपी दत्तात्रय गाडे हा तरुणीला शिवशाही बस गाडी क्रमांक MH 06 BW 0319 या गाडीमध्ये घेऊन गेला. गाडीमध्ये पूर्ण अंधार होता, त्यानंतर पीडितेला संशय आला. हे पाहताच आरोपी गाडे हा पीडितेला म्हणाला रात्री उशीर झाला आहे त्यामुळे प्रवासी झोपलेले असतील म्हणून लाईट बंद केले आहेत. तू वर चढ आणि टॉर्च लावून पहा असं गोड बोलून आरोपी गाडे हा पीडितेला बस मध्ये घेऊन गेला आणि पाठोपाठ तोही त्या गाडीमध्ये चढला. बस मध्ये चढताच गाडेने दरवाजा लावून घेतला आणि पीडितेसोबत अतिप्रसंग केला आणि पसार झाला.

आरोपी पसार झाल्यानंतर तरुणी खाली उतरली घाबरलेल्या अवस्थेत ती स्वारगेट बस स्थानकात होती. घाबरलेल्या अवस्थेत पीडित तरुणीने स्वारगेट बस स्थानकातील एका इसमाला आपल्यासोबत घडलेला सगळा प्रकार सांगितला मात्र तो इसम तिला म्हणाला, ‘लोकं वाईटच असतात तू दुर्लक्ष कर आणि आपल्या गावी निघून जा’. त्यानंतर पुढच्या गाडीने तरुणी आपल्या गावी निघाली. तिने घडलेला सगळा प्रकार फोनवरून आपल्या मित्राला सांगितला त्या मित्राने या पीडित तरुणीला पोलिसात तक्रार दाखल करायला सांगितलं. हडपसर पर्यंत पोहोचलेली तरुणी तिथेच उतरली आणि पुन्हा स्वारगेटच्या दिशेने परत आली आणि स्वारगेट पोलीस स्टेशनमध्ये येऊन सविस्तर तक्रार दाखल केली.

सीसीटीव्ही फुटेजमध्ये भरपूर लोकं दिसत आहे. मुलगी बसमधून उतरली त्यावेळी शेजारी बसमधील ड्रायव्हर चढताना दिसले, लोकांचा वावरही असून जेव्हा आरोपी तिच्याशी बोलत होता तेव्हा तिथे एक व्यक्ती बसली होती. मुलगी त्याच्याबरोबर गेली तिथेही आजूबाजूला लोकं आहेत. आरोपी उतरल्यावर मुलगी लगेच दोन मिनिटांनतर उतरलेली आहे. बसमध्ये निघून गेल्यावर तिने मित्राला फोन केला आणि सर्व प्रकार सांगितला. त्यावर त्याने तक्रार करायला लावली आणि नऊ वाजता पोलीस स्टेशनला आल्याचं डीसीपी स्मार्तना पाटील यांनी सांगितलं.

या घटनेनंतर आता संपूर्ण शहरात संताप व्यक्त केला जात आहे. आरोपीला कठोरात कठोर शासन होण्याची मागणी आता जोर धरत आहे. दरम्यान, पिडीत तरुणीची ससून रुग्णालयात वैद्यकीय चाचणी करण्यात आली आहे. वैद्यकीय चाचणीचा रिपोर्ट संध्याकाळ पंर्यत येणार असून पिडीत तरुणी सध्या ससुन रुग्णालयात ॲडमिट आहे. ससुनमध्ये पीडित तरुणीवर उपचार सुरु आहेत. संध्याकाळी तरुणीला डिस्चार्ज मिळण्याची शक्यता आहे.