रूपाली चाकणकर काय म्हणाल्या…

पुणे हे विद्येचे माहेरघर आहे, अनेक जिल्हे, तालुके आणि वाड्या वस्त्यांमधून मुली शिक्षणासाठी येतात. पुणे कायम सुरक्षित राहिलंय त्याच्यामुळे मुलींना पुण्यात सुरक्षित वाटत असतं. स्वारगेटमध्ये घडलेली घटना धक्कादायक असून सकाळी सहाच्या सुमारास ही घटना घडली आहे. संबंधित मुलीवर अत्याचार करून आरोपी फरार झाला आहे. मुलीने स्वारगेट पोलीस स्टेशनला नऊ वाजता तक्रार नोंदवली. तिथल्या पोलीस अधिकारी पूनम पाटील आणि डीसीपी स्मार्तना पाटील या जातीने लक्ष घातलं आहे. सीसीटीव्ही फुटेज आणि मुलीने सांगितलेल्या वर्णनानुसार आरोपीचे फोटो कलेक्ट करत तो कोण आहे याची माहिती पोलिसांना कळलं आहे. आरोपीच्या तपासासाठी आठ पोलीस पथके तयार केले असून ग्रामीण भागात आणि स्वारगेट परिसरात तपास करत आहेत. आरोपीचा सीडीआर काढला असून लोकेशन मिळेल आणि आज किंवा उद्या आरोपीला अटक होईल, असं रूपाली चाकणकर यांनी सांगितलं आहे.

अनोळखी व्यक्तीसोबत संवाद साधू नका, संबंधित तरूणी मास्क घालून आलेल्या व्यक्तीशी बोलल्यानंतर त्या व्यक्तीने चौकशी केली, कुठे जायचंय, कोणतं गाव आहे, मी सोडतो असं बोलून आरोपी त्या तरूणीला गाडीमध्ये घेऊन गेला. अनोळखी व्यक्ती बोलणं टाळा, आरडाओरडा करायला हवं, असं रूपाली चाकणकर म्हणाल्या.

स्वारगेट परिसरात असे प्रकार घडत असतात. तिथे मटक्याचे अड्डे, गुन्हेगारी प्रवृत्तीचे लोक वावरत असल्याचं काँग्रेसचे माजी आमदार रवींद्र धंगेकर यांनी म्हटलं आहे. या प्रकरणावरून विरोधकांनी सरकारला धारेवर धरलं असून आरोपीच्या मुसक्या आवळ्यात पोलिसांना कधी यश येतं हे पाहणं महत्त्वाचं ठरणार आहे.