याविषयी विस्तृत माहिती अशी की, राष्ट्रीय युवक काँग्रेसचे जिल्हाध्यक्ष अभय कुंडगीर यांनी जिल्हा पातळीवर निवडणूक लढवून युवक काँग्रेसचे जिल्हाध्यक्ष पद मिळवले होते. तरुणांमध्ये चांगला जनसंपर्क असलेल्या अभय कुंडगीर यांनी जिल्हाभरात युवकांचे चांगलेच जाळे निर्माण केले होते. पण नुकत्याच झालेल्या लोकसभा आणि विधानसभा निवडणुकीत काँग्रेसला राज्यात प्रचंड अपयश आले. त्यातच परभणी जिल्ह्यामध्ये एकमेव काँग्रेसचा आमदार असलेल्या सुरेश वरपूडकर यांना देखील पराभव पत्करावा लागला. त्यानंतर जिल्ह्यातील काँग्रेसमध्ये प्रचंड अस्वस्थता निर्माण झाली आहे.

मागील बऱ्याच दिवसांपासून काँग्रेसचे बहुतांश नेते महायुतीच्या वेगवेगळ्या पक्षात जाण्याची चाचपणी करत आहे. त्यामुळेच युवक काँग्रेसचे जिल्हाध्यक्ष अभय कुंडगीर यांनी आपल्या सहकाऱ्यांशी विचार विमय करून भारतीय जनता पक्षात जाण्याचा निर्णय घेतला. युवक काँग्रेसच्या प्रमुख पदाधिकाऱ्यांसह आज पालकमंत्री मेघना बोर्डीकर यांच्या संपर्क कार्यालयावर सायंकाळी सातच्या दरम्यान अभय कुंडगीर यांनी भारतीय जनता पक्षात प्रवेश केला. त्यांच्या या प्रवेशानंतर काँग्रेसच्या अन्य नेत्यांचे देखील प्रवेश महायुतीतील वेगवेगळ्या पक्षात होणार असल्याचे आता स्पष्ट दिसत आहे. त्यामुळे जिल्ह्यात राहिली सायली काँग्रेस देखील संपणार का असा प्रश्न आता निर्माण होत आहे.

विकासाचा अनुशेष दूर करण्यासाठीच भाजपामध्ये प्रवेश- अभय कुंडगीर

परभणी जिल्ह्यासह गंगाखेड विधानसभा मतदारसंघांमध्ये मोठ्या प्रमाणावर गटबाजी आहे. या गटबाजीमळेच विकास खुंटला आहे. गंगाखेड तालुक्यासह जिल्ह्याचा विकास व्हावा यासाठीच आम्ही भारतीय जनता पक्षात प्रवेश केला आहे. येणाऱ्या काळात भाजपच्या माध्यमातून जिल्ह्यातील विकास कामे तडीस नेण्यासाठी प्रयत्न करणार असल्याचेही अभय कुंडगीर म्हणाले.