शेख फैजल अब्दुल कादर असे मयत तरुणाचे नाव

या प्राणघातक हल्ल्यात शेख फैजल अब्दुल कादर ( वय २२, रा. शरीक कॉलनी, किराडपुरा ) या तरुणाचा मृत्यू झाला आहे. फैजल याने डी-फार्मसीचे शिक्षण पूर्ण केल्यानंतर दोन वर्षांपूर्वी करीमनगर येथे स्वतःचे मेडिकल सुरू केले होते. त्याचे वडील सुरक्षारक्षक म्हणून काम करून कुटुंबाचा उदरनिर्वाह चालवतात. शुक्रवारी दुपारी १२ वाजेच्या सुमारास फैजल नेहमीप्रमाणे छत्रपती संभाजीनगर येथील आपल्या मेडिकलमध्ये बसलेला होता. त्यावेळी अचानक काही तरुण तेथे आले आणि त्यांनी फैजलसोबत वाद घालण्यास सुरुवात केली. वाद विकोपाला गेल्यानंतर टोळक्यातील एकाने धारदार चाकू काढून थेट फैजलच्या पोटात वार केले. रक्ताच्या थारोळ्यात पडलेल्या फैजलला सोडून आरोपी घटनास्थळावरून पसार झाले.

खुनाचे ठोस कारण अस्पष्ट; पोलिसांचा तपास सुरू

हा खून कोणी आणि नेमक्या कोणत्या कारणातून केला, याचे ठोस कारण अद्याप समजू शकलेले नाही. घटनेची माहिती मिळताच हर्सूल पोलीस आणि फॉरेन्सिक पथकाने घटनास्थळी धाव घेऊन पाहणी केली. पोलिसांनी संशयित आरोपींच्या शोधासाठी विशेष पथके रवाना केली असून, पोलीस ठाण्यात गुन्हा दाखल करण्याची प्रक्रिया सुरू आहे. पोलीस या प्रकरणाचा सर्व बाजूंनी अधिक तपास करत आहेत.