नांदेड जिल्ह्यात चोरीच्या घटनांमध्ये प्रंचड वाढ झाली आहे. दररोज चोरीच्या घटना घडत आहेत. जुना कौठा येथील व्यापारी सत्यनारायण कासट यांच्या घरी चोरीची घटना घडली. ते सरकीपेंडचे व्यापारी आहेत. सत्यनारायण कासट आणि त्यांची पत्नी शुक्रवारी प्रयागराज येथे कुंभमेळ्यासाठी गेले. तर त्यांचा मुलगा आणि सून हे दोघे जण आदिलाबाद येथे कामानिमित्त गेले होते.

या दरम्यान रविवारी सकाळी साडेतीन वाजेच्या सुमारास अज्ञात चोरट्यांनी घराचे मुख्य प्रवेशद्वाराचे कडीकोंडी आणि कुलुप तोडून प्रवेश केला. बराच वेळ थांबलेल्या चोरट्यांनी घरातील प्रत्येक सामान विस्कटून टाकले. तर कपाटाचे लॉक तोडून लाखो रुपयांच्या सोन्याचे दागिने आणि जवळपास दोन लाख नगदी रुपये असा एकूण लाखोंचा ऐवज लंपास केला.

चोरट्यांनी जवळपास 80 तोळे सोनं आणि दीड लाख रुपये रोख रक्कम चोरी केल्याचे कुटुंबियांनी सांगितले. रविवारी सायंकाळी आदिलाबादहून परतलेल्या कासट कुटुंबीयांच्या सदस्यांना घराचे कुलुप तोडल्याचे दिसून आल्यानंतर चोरी झाल्याचे लक्षात आले. यानंतर तातडीने पोलिसांना या घटनेची माहिती देण्यात आली.
25000 रुपये काढता येणार, RBI कडून न्यू इंडिया को-ऑपरेटिव्ह बँकेच्या ग्राहकांना दिलासा
पोलीस कर्मचारी डॉगस्कॉडसह घटनास्थळी दाखल झाले. पण चोरट्यांचा शोध काही लागला नाही. या धाडसी चोरीची घटना सीसीटीव्हीमध्ये कैद असून दोन चोरटे त्यात दिसत आहेत. या घटनेनंतर चोरटे ऐवजसह डिव्हिआर घेऊन पसार झाले. विशेष म्हणजे सीसीटीव्ही कॅमेऱ्यमध्ये चेहरा दिसू नये म्हणून एका चोरट्याने मंकी कॅप घातले तर दुसऱ्याने डोक्यावरील टोपीवर बॅटरी लावली होती. चोरट्यांनी पाऊण तासात लाखो रुपयांवर हात साफ केला. या प्रकरणी ग्रामीण पोलीस ठाण्यात गुन्हा दाखल करण्यात आला आहे. पोलीस चोरट्याचा शोध घेत आहेत.