पुण्यातील काँग्रेस नेते तथा माजी आमदार रवींद्र धंगेकर यांच्या मुलाच्या वाढदिवस साजरा करायला शिवसेना नेते उदय सामंत यांनी हजेरी लावली. स्वतः उदय सामंत यांनी धंगेकरांसोबतच्या भेटीचे फोटो ट्विट केले आहेत. यामुळे राजकीय वर्तुळाच्या भुवया उंचावल्या आहेत.
Eknath Shinde : ‘महायुती म्हणजे फेव्हिकॉल का मजबूत जोड है…’ एकनाथ शिंदेंनी विरोधकांना तिखट शब्दांत सुनावले
दरम्यान रविंद्र धंगेकर यांनी काही दिवसांपूर्वी एकनाथ शिंदे यांची भेट घेतली होती. त्यानंतर धंगेकर हे शिवसेनेत प्रवेश करणार असल्याचा चर्चा सुरु आहेत. तर 20 फेब्रुवारीला रविंद्र धंगेकर यांचा मुलगा प्रणव धंगेकर याचा वाढदिवस होता. हा वाढदिवस पुण्यातील एका पंचतारांकित हॉटेलमध्ये साजरा करण्यात आला. उदय सामंत यांनी यावेळी उपस्थिती लावली होती. रविंद्र धंगेकर यांनी मोठ्या नेत्यांसह मुलाचा वाढदिवस साजरा केला.

कालच रवींद्र धंगेकर यांनी गळ्यात भगवा टाकून व्हाट्सअप स्टेटस ठेवला होता. यावर उदय सामंत यांनी देखील प्रतिक्रिया दिली होती. रवींद्र धंगेकर यांच्या भगव्यावर शिवसेनेचे धनुष्यबाण दिसले तर मला आनंद होईल, अशी प्रतिक्रिया उदय सामंत यांनी दिली होती. त्यामुळे धंगेकर यांची शिवसेना नेत्यांशी असलेली जवळीक पाहता लवकरच धंगेकरांचा काँग्रेससमधून ‘अस्त’ तर शिवसेनेत ‘उदय’ होण्याची शक्यता वर्तविण्यात येत आहे.

दरम्यान, नुकतीच काँग्रेसच्या प्रदेशाध्यक्षपदी हर्षवर्धन सपकाळ यांची नियुक्ती झाली. त्यानंतर पुणे शहर काँग्रेसमध्येही नव्या नियुक्त्या करण्यात आल्या. परंतु कसबा विधानसभा मतदारसंघाचे निरीक्षक म्हणून धंगेकरांना स्थान न मिळाल्याने त्यांना धक्का असल्याचे मानले जाते. मागील पोटनिवडणुकीत काँग्रेसकडून रवींद्र धंगेकर यांनी ही जागा जिंकली होती, परंतु विधानसभेला भाजपच्या हेमंत रासनेंकडून धंगेकरांना पराभूत व्हावं लागलं. त्यामुळे या विधानसभा मतदारसंघात काँग्रेसने अधिकचा जोर लावण्यासाठी ज्येष्ठ नेते आणि महाराष्ट्र राज्य प्रदेश काँग्रेसचे विद्यमान सरचिटणीस अभय छाजेड यांच्यावर जबाबदारी सोपवली आहे. त्यामुळे आता रवींद्र धंगेकर लवकरच काँग्रेसला सोडचिठ्ठी देत शिवसेनेत प्रवेश करतील अशा चर्चा राजकीय वर्तुळात रंगत आहेत.