Sudhir Mungantiwar And Devendra Fadnavis: सुधीर मुनगंटीवार हे फडणवीसांवर नाराज असल्याच्या चर्चा होत्या. पण, आज चंद्रपुरात झालेल्या एका कार्यक्रमात हे दोघेही एकत्र दिसले.
नाराजी नाट्यावर पडदा
आज मात्र देवेंद्र फडणवीस आणि सुधीर मुनगंटीवार इतक्या दिवसांनी एका मंचावर आले होते. त्यामुळे नाराजी नाट्यावर पडदा पडला आहे. यातून दोन्ही नेत्यांनी हम साथ साथ है, याचं दर्शन घडवून दिलं. चंद्रपूर येथील सन्मित्र महिला नागरी सहकारी बँकेच्या रौप्य महोत्सवी कार्यक्रमात ते एकत्र आले होते. या दरम्यान, त्यांनी चर्चा ही केल्याचं दिसून आलं. हे पाहून काहींच्या भुवया सुद्धा उंचावल्या आहेत, तर राजकीय वर्तुळात चर्चांना उधाण आलं आहे.
खरंतर चंद्रपूर भाजप म्हटलं की सुधीर मुनगंटीवार हे समीकरण राज्याचा राजकारणाला ठाऊक आहे. मुनगंटीवार यांचं पक्षासाठी त्यांचं योगदानही मोठं आहे. त्यामुळेच की काय, भाजपाची राज्यात येऊ घातली की मुख्यमंत्रीचा नावाचा चर्चेत मुनगंटीवार यांचं नाव यायचं. मात्र, २०२४ मध्ये झालेल्या विधानसभा निवडणुकीनंतर काहीस चित्र बदललं. त्याला कारण ठरलं आमदार किशोर जोरगेवार यांचा भाजप प्रवेश. जोरगेवार यांच्या भाजप प्रवेशाला मुनगंटीवार यांनी विरोध केला होता. मात्र, पक्षाने जोरगेवार यांना उमेदवारी दिली. मुख्यमंत्री देवेंद्र फडणवीस यांच्या जवळ जाण्यात जोरगेवार यांना यश मिळालं. मुख्यमंत्री झाल्यानंतर फडणवीस जेव्हा जेव्हा चंद्रपुरात आलेत तेव्हा तेव्हा मुनगंटीवार गैरहजर होते. हा नुसता योगायोग नव्हता अशा चर्चा राजकीय वर्तुळात रंगल्या होत्या. मात्र नाराजी नाही, असं फडणवीस आणि मुनगंटीवार यांनी माध्यमातून सांगितले. शेवटी आज चंद्रपुरातील कार्यक्रमात दोघेही एकत्र दिसल्याने नाराजी असल्याचा चर्चांना सध्या तरी पूर्णविराम मिळाले आहे.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा