Dhananjay Munde in NCP Core Group : संतोष देशमुख हत्येप्रकरणी विरोधकांसह सहकारी पक्षांच्या आमदारांच्या निशाण्यावर असतानाही धनंजय मुंडेंना राष्ट्रवादी पक्षात मानाचे स्थान देण्यात आले आहे. आगामी निवडणुका डोळ्यासमोर ठेवून राष्ट्रवादी पक्षाकडून कोअर ग्रुप स्थापन करण्यात आला आहे. ज्यामध्ये मुंडेंची वर्णी लागली आहे.
कोअर ग्रुपमध्ये कोण कोण?
कोअर ग्रुपच्या अग्रस्थानी पक्षाचे अध्यक्ष अजित पवार राहणार आहेत. तर त्यांच्यासोबत आणखी सहा मंत्र्यांना या कोअर ग्रुपचे सदस्य करण्यात आले आहे. पक्षाचे राष्ट्रीय कार्याध्यक्ष खा. प्रफुल्ल पटेल, प्रदेशाध्यक्ष खा. सुनील तटकरे, ज्येष्ठ नेते आ. छगन भुजबळ, आ. दिलीप वळसे पाटील, वैद्यकीय शिक्षण मंत्री हसन मुश्रीफ आणि अन्न व नागरी पुरवठा मंत्री धनंजय मुंडे यांचा कोअर ग्रुपमध्ये समावेश आहे. आगामी निवडणुकांसाठी पक्षसंघटनेची बांधणी, महत्वाच्या धोरणांची आखणी आणि अंमलबजावणी करणे याची जबाबदारी सदस्यांवर असणार आहे.
दरम्यान, धनंजय मुंडेंवर आतापर्यंत अनेकांकडून आरोपास्त्र डागण्यात आले आहे. तर त्यांच्या राजीनाम्याची मागणी अजूनही लावून धरली जात आहे. असे असताना अजित पवारांनी त्यांच्यावर महत्वाची धुरा सोपवल्याने राजकीय वर्तुळाच्या भुवया उंचावल्या आहेत.
सामाजिक कार्यकर्त्या अंजली दमानिया यांनी मुख्यमंत्री देवेंद्र फडणवीस आणि उपमुख्यमंत्री अजित पवारांची भेट घेऊन काही पुरावे सादर केले आहेत. तर धनंजय मुंडेंचा राजीनामा घ्यावाच, अशी आक्रमक त्यांनी भूमिका घेतली आहे. असे असताना अजित पवारांनी मुंडेंबाबत मात्र सौम्य भूमिका घेतल्याचे पाहायला मिळाले. पवारांनी देशमुख हत्या प्रकरणातील दोषींवर कडक कारवाई होणार आणि निर्दोश लोकांवर कारवाई केली जाणार नाही, अशी भूमिका घेतली होती. त्यानंतर आता अजितदादांनी पक्षाच्या कोअर ग्रुपमध्ये धनंजय मुंडेंना स्थान दिल्याने ते मुंडेंवर मेहरबान असल्याचे चिन्ह आहेत.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा