अंधेरी वर्सोवातील कट्टर शिवसैनिक आणि नेत्या राजूल पटेल यांनी शिवसेना उबाठा पक्षाला रामराम ठोकून सोमवारी शिंदे यांच्या शिवसेनेत प्रवेश केला. मात्र पक्षांतर करण्याआधी त्यांनी वर्सोव्यातील शाखेला टाळे ठोकले होते. पूनम गार्डन परिसरातील शिवसेनेची शाखा अनेक वर्षांपासून उबाठा गटाच्या ताब्यात आहे. मात्र आता या शाखेचा ताबा मिळवण्यावरून शिवसेना आणि ठाकरे गट आमने सामने आले आहेत.

अनिल परब यांची टीका

‘राजूल पटेल यांनी २४ तासांत शाखा खाली करावी अन्यथा ती ताब्यात घेऊ,’ असा इशारा शिवसेना उबाठा पक्षाकडून आमदार अनिल परब यांच्या उपस्थितीत देण्यात आला. ‘त्यांच्या २० वर्षाच्या राजकीय कारकिर्दीत विभागप्रमुख म्हणून उभा राहिलो. ज्यांना शिवसेनेमुळे समाजात ओळख मिळाली, शेवटी त्यांनीच गद्दारी केली. ती पैशासाठी केली की कशासाठी, हे त्यांनाच माहिती आहे,’ असे टीकास्त्र आमदार अनिल परब यांनी सोडले.

दरम्यान, राजूल पटेल यांनीही यावर प्रतिक्रिया देताना, ही जागा आपणच विकत घेतल्याचा दावा केला. ‘१९९७ मध्ये मी पहिल्यांदा नगरसेविका झाल्यावर चार लाख रुपये देऊन ती जागा विकत घेतली होती. १९९९ पासून त्या जागेचे वीजबिल माझ्या नावावर आहे. कोणी या शाखेसाठी मार खाल्ला असे म्हणत असेल, तर तसा पुरावा आणून द्यावा,’ असे आव्हान पटेल यांनी अनिल परब यांना दिले. तसेच ‘मी शाखा बनवली आहे, लोकांसारखी कार्यालये थाटलेली नाहीत. शाखेची मालकी माझी आहे,’ असा दावा पटेल यांनी केला.
Uddhav Thackeray : भाजपातून ठाकरे गटात, मायलेकाने दोनच महिन्यात शिवबंधन सोडलं, मनपा निवडणुकांच्या तोंडावर झटका

मिरा भाईंदरमध्येही दोन शिवसेना आमनेसामने

दुसरीकडे, मिरा-भाईंदरमधील शिवसेनेची शाखा ताब्यात घेण्यावरूनही ठाकरे आणि शिंदे गटाचे कार्यकर्ते सोमवारी रात्री एकमेकांशी भिडले. ठाकरे यांच्या शिवसेनेच्या एका पदाधिकाऱ्याने नुकताच शिंदे यांच्या शिवसेनेत प्रवेश केल्यानंतर, त्याने शाखेवर दावा ठोकला आहे. तणावामुळे शाखेबाहेर पोलिस बंदोबस्त तैनात करण्यात आला आहे.

मिरा रोडच्या एस. के. स्टोन परिसरात शिवसेना उबाठा पक्षाची एक शाखा आहे. शिवसेना उबाठा पक्षातून शिंदे यांच्या शिवसेनेत गेलेले शिवशंकर तिवारी हे या शाखेचा ताबा घेण्यासाठी गेले. त्यांना शाखेत उपस्थित असणाऱ्या ठाकरे यांच्या पक्षाच्या पदाधिकाऱ्यांनी विरोध दर्शवला. यावेळी दोन्ही पदाधिकाऱ्यांमध्ये वादावादी आणि धक्काबुक्की झाली.
Uddhav Thackeray : संजय राऊतांचा दौरा आणि ठाकरे गटाला खिंडार, पुण्यात सलग दुसऱ्यांदा समीकरण जुळलं, उद्धव ठाकरेंची…
या शाखेची उभारणी व देखभाल आपणच केल्याचा दावा तिवारी यांनी केला आहे. तर, ‘पदाधिकारी दुसऱ्या पक्षात गेला म्हणून शाखा त्याची होत नाही, शिंदे गटाकडून शाखा ताब्यात घेण्यासाठी बळजबरी सुरू आहे,’ असा आरोप ठाकरेंच्या शिवसेनेच्या महिला जिल्हा संघटक नीलम ढवण यांनी केला.