एसटीच्या संभाव्य भाडेवाढ बाबत देखील अजित पवार यांनी आपली भूमिका स्पष्ट केली आहे. जास्तीत जास्त नवीन बसेस घेऊन चांगली सुविधा शहरी आणि ग्रामीण भागातील प्रवाशांना द्यायची आहे. अशी चर्चा सुरू आहे मात्र अंतिम निर्णय अजून झालेला नाही. कारण मुख्यमंत्री पहाटेच परदेशातून आलेले आहेत. हे महत्त्वाचे निर्णय मुख्यमंत्र्यांच्या कानावर घालूनच घ्यायचे असतात. त्यामुळे त्यांना विचारून पुढचा निर्णय घेण्यात येईल. शेवटी महामंडळ पण व्यवस्थित चाललं पाहिजे आणि जनतेला पण त्रास कमी झाला पाहिजे. असा मध्यमार्ग काढण्याचा आमचा प्रयत्न असल्याचं अजित पवार म्हणाले आहेत.

दरम्यान डिझेल, चेसीस, टायर यांच्या किमतीत झालेली वाढ तसेच महागाई भत्त्यात वाढ झाल्यामुळे आपोआप भाडेवाढ सुत्रानुसार उपाध्यक्ष आणि व्यवस्थापकीय संचालक, महाराष्ट्र राज्य मार्ग परिवहन महामंडळ यांनी दिनांक ०१ फेब्रुवारी २०२५ रोजीच्या पत्रानुसार महाराष्ट्र राज्य मार्ग परिवहन महामंडळाच्या बसेसच्या प्रवासी भाडेदरात वाढ करण्याचा प्रस्ताव सादर केला होता. या प्रस्तावास राज्य परिवहन प्राधिकरणाच्या २७६ व्या बैठकीत मंजूरी मिळाली आहे. मात्र अजित पवार यांनी केलेल्या वक्तव्यामुळे आता नवीन भाडेवाढ आकारली जाणार का? याबाबत संभ्रम निर्माण झाला आहे.